Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,004 Autor: Guilhem Ademar Genre: Canso Numero: XIV

 Comensamen comensarai

 

I	1	Comensamen comensarai
		Comensan, pus comensar sai,
		Un vers vertadier e verai,
		Tot ver veramen, e. veirai
	5	Si poirai descujar, cujan,
		La cuja que·m cujei l'autr'an,
		Cujan, cujaires primms, primiers
		Primamen ab prims cossiriers.
II		Cossiros de cossir d'esmay,
	10	Cozens cossirs cossiraray.
		De tal que, se·l talanz no·m tai,
		Mos talanz no·m taizara may.
		Ans· vauc de bresc entrebrescan,
		Debresc entrebrescat d'enjan,
	15	Don no vuelh esser parsoniers,
		Pars, parïaire ni pariers.
III		Paria de par par dechai,
		Quan pars fai faitz qu'a far no fai.
		Ieu no·ls fi anc ni no·ls farai:
	20	Fols sens ves mi far no·m s' eschai,
		Ni vuelha Dieus tan de mon dan
		Qu'ieu dampnatge fassa tan gran
		Ves lieys de cuy suy domengiers
		A dreg, per dreg, dregz, dreituriers.
IV	25	Adrech, a dompna drecha vay
		- Drechamen drecha -, on joys jay.
		Dieus, si jauzïons jauziray,
		Jauzïons ab midons jairay,
		Ab la gensor de mil aitan?
	30	Milïa miliers mil i a·n,
		Tan quant a mais en mil milhiers
		Milïa mil qu'en dos diniers.
V		Deniers - pus «deniers» mentaurai
		Tan soven - per deniers, no·m plai;
	35	Mas quar fenisc ma cobla lay
		En «deniers», die tans «deniers» sai.
		Que denier trop de mi no·s fan,
		Ni miey cossir ves els no van;
		Que mos cors es rics e richiers
	40	E richamen rics e sobriers.
VI		Ieu suy Guillems que vau mesclan
		Amansa d'amador d'aman.
		Amans amaire sobransiers
		Suy als sobrans sobresobriers.