Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 218,001=128,001 Autor: Guilhem Ademar , Eble de Saignas Genre: Partimen Numero: XV

 N'Ebles, chauzes en la meillor

 

I	1	N'Ebles, chauzes en la meillor
		Ades segon vostr'escïen:
		Lo cals a mais de penzamen
		E de conzirer e d'error,
	5	Cel qe ganren deu e pagar
		Non pot - ni·l volon esperar -
		O cel q'a son cor e s'amor
		Mes en donna, e re no·il fai qe·il plaia?
		Chauzes! Q'eu sai aqel qe plus s'esmaia.
II	10	Guillem A[i]mar, anc per amor
		Piegz non trais hom de mon viven
		Con ai fag e faz; ni enten
		C'om plus deia de ma ricor:
		Per q'ieu sai, con per issajar,
	15	Qe jes no·s fai a comparar
		Dolors d'amador ab dolor
		D'om'endeutat; que res non es piegz traia
		D'om'a cui dis chascus: «Paia mi! Paia!»
III		Ges no·s fai dolors d'amador
	20	A l'aitre qe anatz dizen,
		N'Ebles: anz n'a piegz per un cen
		D'ir'e d' esmai e de tristor
		Cel q'ama qui no vol amar
		Qe l'autre qe deu mout pagar.
	25	Per deute, sabon li pluzor,
		Non morra ja hom, sol qe amor aia;
		Mas d'amor mor plus tost qe d'autra plaia.
IV		Guiliem Aimar, qan li deutor
		Mi van ades entorn seguen
	30	E l'us mi tir'e l'autre pren
		E m'apellon baratador,
		Volri'esser mortz ses parlar.
		Q'eu no m'aus em plass'estanchar,
		C'ai'afiblat drap de color,
	35	Qe hom non ve qe sa lengua no·m traia;
		Mas s'ieu trac mal d'amor, dreitz es qe·m plaia.
V		Donc, n'Ebles, li dompnejador
		E·il gai e·il cortes e·il plazen
		Seran ab mi del jutjamen,
	40	E ab vos seran l'ublador
		E d'aital gen qe no sap far
		Mas cant caitivier amassar.
		Mout vos da deutes gran paor,
		E es semblan, qan per deutes s'esmaia
	45

 

VI		Fe q'ieu dei a Nostre Segnor,
		Aitan se pert hom endeutatz q'assaja
		Domn'a preiar, qe per deute s'esmaia.
VII		N'Ebles, joves qe vol honor
	50	Ni ama donna, ops es q'en pretz traia