Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,007 Autor: Guilhem Ademar Genre: Sirventes Numero: XVI

 Ieu ai ja vista manhta rey

 

I	1	Ieu ai ja vista manhta rey
		Don anc no fis semblan que vis,
		Ez ai ab tal joguat e ris
		Don anc guaire no·m n'azautey,
	5	Ez ai servit a manht hom pro
		On anc no cobrey guazardo;
		Ez a manh nesc' ab fol parlar
		Ai vist trop ben far son afar.
II		Et ai ja vist per avol drut
	10	A domna marit dezamar
		Ez a manht nesci acabar
		Pus qu'az un franc aperceubut;
		E per dompnas ai ja vist ieu
		A manht hom metr'en folh lo sieu,
	15	Ez ai ne vist amat ses dar
		E mal volgut ab mot donar.
III		Ieu ai vist donas demandar
		Ab plazers ez ab honramens,
		Pueys veni'us desconoyssens
	20	Abrivatz de nesci parlar
		Que n'avia la mielher part.
		Esguardatz si son de mal art!
		Manhtas n'i a que-ls plus savays
		Acuelhon mielhs en totz lurs plays.
IV	25	Ieu ai vist en dompnas ponhar
		D'ensenhatz e de ben apres
		E·l nesci avenir nemes
		Que·l plus savi ab gen preyar;
		Ez ai vist nozer chauzimens
	30	A trop-valer ab trichamens;
		Per que val mais, a mos entens,
		En luec foudatz que sobriers sens.
V		A dompn'ai vist hom encolpar
		De so que no meria mal
	35	E que so laissavon de tal
		On se pogr'om a dreg clamar.
		Ez ai ja tal ren esguardat
		On m'ai en van mon cor virat;
		Per que m'a·n fait mos rics volers
	40	Manhtas vetz dans e desplazers.