Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 241,001 et 457,002a Autor: Giraut, Uc de Sant Circ Gènere: Deux coblas avec deux tornadas (et réponse) Número: XL

 

N'Uc de Sain Circ, ara m'es avengut / Amic Giraut, tant me fai de vertut

		I.
		[GIRAUT A N’UC DE SANSIRC.
I	1	[N’Uc de Sain Circ, ara m’es avengut
		Zo qe m’avetz lonjamen augurat,
		Qes eu trob un qi m’aia mantengut
		Ni·m voilla re del seu aver donat.
	5	Isneillamen l’ai près, e molt de cors,
		E sai oimais e conoissi fort be
		Com hom paubres se guida ni·s mante
		Sols ses amics loing en autrui regnat.
II		Qe se no fos sel qe m’a retengut
	10	E·m dona pan e vin e fen e blat,
		Eu agra spes del groing del ver agut ;
		Si tot lo ai’ ogan aissi provat, —
		Qe dirai lo, no sai si s’ er folors, —
		Plagut m’agra qe fossetz sai ab me,
	15	Qe sabriatz dire, si cum eu cre,
		Qal vida trais pois passei part Moncat.
III		[Donc e]u prec Deu qe de bo astre estre
		E don honor cel qe zai trames me
		E·ill don plazer e vida e santat.
IV	20	E pois prec Deu, per sa santa merce,
		Qe destrua e confonda e malme
		Sels qe vas lui an mala volontat.]
		II.
		N’UC LI RESPONDET ASI :
V		Amic Giraut, tant me fai de vertut
		Deus c’ades sunt tut ver lli mei orat,
	25	Q’eu ai dizen desirat e volgut
		Qe vos desset venir en paubretat ;
		Qe paubreira mostra cum es dolzors
		Al prendedor lo prendres, qi·ll fai be.
		Oimais sabretz del prendre plus de me,
	30	En tal avetz lo prendre comensat.
VI		Ben entendi per qe avetz volgut
		Qe totas vetz ages ab vos estat,
		Q’eu vos agra fam e maint set tolgut
		E vos agra de maint enoi loingnat.
	35	Be·us deu plazer se vos, en aqest cors,
		Avetz apres com paubres se conte
		Ben a cinc ans q’aitals paubreira·us te...
		.  .  .  .  .  .  .  .  .  .  .  .  .  .  .  .  .
VII		.  .  .  .  .  .  .  .  .  .  .  .  .  .  .  .  .
	40	.  .  .  .  .  .  .  .  .  .  .  .  .  .  .  .  .
		Si vos acsetz un larc ubert trobat.
VIII		Non a joglar d’aqi a Saint-Cere
		Qe meilz de vos grazisca qi·ll fai be
		Ni qi·l socor a sa gran paubretat.