Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,001 Autor: Pistoleta Gènere: Canso Número: I

 

Ai! tan sospir mi venon noit e dia

I	1	Ai ! tan sospir mi venon noit e dia
		que me porton salutz et amistatz
		e que·m preien qez eu me torn viatz
		vas ma domna qu’es li gensier que sia
	5	e que mais a de pretz e de valor
		que null’ autra ; aissi·m don dieus s’amor,
		com eu sui certz ses cuitz e sens albire,
		que de mais ren non sai las genz ver dire.
II		E car plus ai estat qu’om men deuria,
	10	tem qu’eu sia molt faillitz en tal patz ;
		mas lo grant tort pladeia pietatz,
		e ma domna a tant de cortesia
		c’umelitatz tempra sa gran ricor
		e·ill toill orgoillz, per essausar l’onor
	15	que·ill dona deus qu’a tuitz la fai eslire
		per la meillor que·s vesta ne se mire.
III		Cil trobador fan m’en tuit garentia
		en lors chansos, si a mi non crezatz,
		que tot lo ben, a qualqe dir l’auiatz,
	20	disson de llei e de sa seingnoria ;
		neis l’auselet s’alegron per s’amor
		can la vezon, tals iois n’an entre lor !
		gardatz de mi si dei chantar ne rire !
		car [tan la] laus ni ai tan ric desire.
IV	25	Mas lo desir conosc qu’es grans follia,
		car ia son carcs, pero nuls hom faidatz
		non deu esser per dreit ochaisonatz,
		qu’estiers mon grat volh so c’ops non m’auria,
		mas honors m’es ; per deu ! no·n fatz clamor,
	30	anz m’es deleis, on plus trag greu dolor,
		car en pensan la bais et la remire,
		mas eu non voill qu’ella me l’auia dire.
V		Al cortes rei, qu’es reis sens vilania
		e reis de gauz e reis de largetatz,
	35	reis de domnei e reis de bon solatz,
		reis d’acuillir e de dousa paria,
		reis d’ardimenz e reis senes paor,
		reis d’Arragon, de eui ai fait seingnor,
		t’en vai, chansos ! que vas lui [eu] me vire,
	40	sai ses amic, sens hom e sens servire.