Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,004a Autor: Pistoleta Gènere: Canso Número: III

 

Ia nuls amanz no·s fegna

I	1	Ia nuls amanz no·s fegna
		ame tant finamen
		cum eu; q’anc fuecs en legna
		no·s pres tan aspramen,
	5	cum [fin’] amors s’es pres’ en me,
		si qe per tot, qant ai, me te ;
		per q’es fols qi·m chastia
		q’euades gais non sia.
II		Bonaventura·m vegna
	10	d’aqella q’eu enten,
		qe de mos braz la cegna
		et ill me eissamen
		e·ill plassa qe d’un bais m’estre,
		plus no·ill deman, qar no·s cove ;
	15	qe s’eu aitan n’avia,
		per pagatz m’en tenria.
III		Q’en tant qant soleils regna
		non a tan avinen,
		ni tam bella no·s segna
	20	ni porta vestimen,
		ni nula tan gent no·s capte,
		cum ma dona fai per ma fe,
		e qi m’en desmentria,
		a tort sai q’o faria.
IV	25	Mas grieu [m’es] car no·m degna
		auzir ni far parven
		qe mos precs en grat pregna,
		anz s’en ri dolzamen,
		qant li dic qe mais l’am qe re ;
	30	com plus lo·il iur, e meinz m’en cre ;
		mas se mon cor sabia,
		senz iurar m’en creiria.
V		Hai ! s’er qe l’en sovegna
		ni n’aia chauzimen ?
	35	q’altra non voill m’estregna
		ni ai entendimen ;
		e fassa·m, si·s vol, mal o be
		e del tot si’ en sa merce,
		q’atressi so seria,
	40	tan ha de segnoria.
VI		S’ieu del rei me partia
		d’Aragon, failliria.