Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Codi: 248,087 Autor: Guiraut Riquier Gènere: Vers Número: IX

 

Cristias vey perilhar

		LO VIIII VERS D'EN GUIRAUT RIQUIER, L'AN MCCLXXVI, EN .I. IORN X. KL' DE MARZ
I		Cristias vey perilhar
		per colpa dels regidors,
		quar entr'elhs no cap amors
		ni patz ni dreitz, qu'ab tortz far
	5	son d'autruy dreg enveyos,
		e creys lurs iniquitatz,
		creyssen lurs possessïos.
II		En aisso truep voluntos
		lo pus de las poestatz;
	10	ja non dirai dels prelatz,
		qu'ilh devon governar nos
		mostran via per salvar:
		si·s fan don lur tanh lauzors,
		e Dieus fassa·ls drech guidar.
III	15	Per sas obras deu mostrar
		selh que repren las follors,
		si que·l n'eschaya honors;
		qu'ayssi deu hom essenhar,
		quar non es maiestres bos
	20	per sol dictar apellatz,
		si·ls faitz no fa cabalos.
IV		Aisso lays, qu'autra razos
		m'o tolh, don suy apessatz:
		que·ls reys truep desacordatz
	25	que d'un voler no·n sai dos,
		tant vol quascus contrastar
		ab l'autre, don es paors
		que Dieus tot o desampar.
V		Un temps volc Dieus yssausar
	30	crestïas, e·l fon sabors
		quar el pus era valors
		e pessavan d'elh honrar
		contra Sarrazis fellos;
		ez avian entr'elhs patz
	35	ez amor totas sazos.
VI		Mas er es contrarïos
		l'us a l'autre, que duptatz
		no· y es enjans ni baratz
		ni cuberta tracïos;
	40	l'us cuia l'autr'enjanar,
		mas pus greu m'es dels maiors
		que·l mals pot a mais montar.
VII		Quant l'us ve l'autre baissar,
		se deurian far socors,
	45	quar qui val a valedors;
		mas estiers los vey obrar
		que del creysser son gilos
		e del mermar fan solatz,
		qu'om val als pus poderos.
VIII	50	Bos reys castellas n'Anfos,
		ab dreg faitz tot quant fassatz
		ez auretz pro companhos.
IX		E·l devers sia gardatz
		vostres e·l ricx pretz per vos.