Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,006 Autor: Pistoleta Gènere: Canso Número: V

 

Plus gais sui q'eu non sueill

I	1	Plus gais sui q’eu non sueill
		e plus enamoraz,
		si tot non sui amaz
		per leis c’am mais qe me,
	5	ab cui non trob merce,
		ni la i pot hom trobar ;
		gardaz, se·ill volgues mal,
		si se·n feira preiar.
II		E car autra non voill
	10	en dreit d’amor, ni·m plaz,
		e car li·m sui donaz
		de bon cor per iase,
		ni m’acuoill ni·m fai be,
		neus apenas sonar
	15	mi deigna, qant mi ve,
		e no·m n’aus rancurar.
III		Et a pauc no·m trais l’uoill,
		qant li dis per solaz:
		„dompn’, ie·us am, so sapchaz,
	20	mais qe neguna re“ ;
		e si·m faz, per ma fe.
		Deus m’en lais mon pro far ;
		si fara, qan qe tric,
		mas trop m’o pot tarzar.
IV	25	Doncs, per qe no m’en toill ?
		ara·m venqet foldatz !
		anz suffrirai en paz,
		qar enaissi·s cove ;
		qe fols es qi·s recre :
	30	q’eu am mais esperar
		lo seu honrat esper
		q’ab autra gazaignar.
V		Chansos, part Eissidoill
		t’en vai tost e viaz
	35	a la bell’ on beutatz
		es e tuit complit be ;
		q’ella non faill en re,
		anz s’en sap be gardar,
		qe si e Ventadorn
	40	fai chascun iorn puiar.
VI		Del franc rei me sove
		d’Aragon, cui Deus gar !
		que senes totz engeinz
		regn’ e ses malestar.