Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 356,008 Autor: Peire Rogier Gènere: Vers Número: 2

 

Tan no plou ni uenta

I	1	Tan no plou ni uenta,
		qu’ieu de chan non cossire,
		frei’ aura dolenta
		no·m tolh chantar ni rire,
	5	qu’amors me capdelh’ e·m te
		mon cor en fin ioy natural,
		e·m pais e·m guida e·m soste,
		qu’ieu non suy alegres per al
		ni alres no·m fai uiure.
II	10	Ma dompna es manenta
		de so qu’ieu plus dezire ;
		del donar m’es lenta,
		qu’anc no·n fuy may iauzire ;
		ben sai que pauc l’en soue,
	15	e ges no·m part ioc cominal,
		qu’ilh pensa petit de me
		et ieu trac per lieys mal mortal,
		tal qu’a penas puesc uiure.
III		No trop qui·m guirenta
	20	ni qui m·o auze dire,
		q’un’autra tan genta
		e·l mon se li ni·s mire ;
		ni d’autra non s’esdeue,
		mas qu’om digua que re no ual,
	25	qu’elha ditz e fai tan be,
		q’una contra lieys no sap sal ;
		tal domna fai a uiure.
IV		Si s’en fenhon trenta,
		ges per so no·m n’ahire ;
	30	cuy que·s uol si·s menta,
		qu’a mi·s denh’escondire ;
		qu’adonc sai ieu ben e cre
		q’us non a dompna tan cabal,
		quan quecx la lauza per se,
	35	que s’el n’auia un’aital
		ben pogra ses lieys uiure.
V		Greu planh mal que·n senta
		drutz, quant es bos sufrire,
		qu’amors es ualenta
	40	seluy que n’es chausire ;
		erguelh no uol ni mante,
		ans qui lo·lh mostra, lieys non cal,
		que mais n’auria ab merce
		en un iorn qu’en dos ans ab mal
	45	sel qu’ab erguelh uol uiure.
VI		Si uns s’i prezenta,
		que·l denh lonc sé assire,
		ges no m’espauenta,
		qu’ab mi l’ai a deuire,
	50	que dona, quant en pretz ue,
		deu auer fin cor e leyal ;
		e non crezatz que·s malme
		contra son bon amic coral
		als dias, qu’ay’a uiure.
VII	55	E s’il fay paruenta
		que·l guinh ni·l huel lor uire,
		per so no·s guaimenta
		mos cors ni·s mand’aucire ;
		que dompna fai manta re
	60	per que plass’a totz per engual,
		e quasq’un cum li coue
		deu aculhir dins son ostal,
		s’ab gran bontat uol uiure.
VIII		Peir Rogiers per bona fe
	65	tramet lo uers denant nadal
		a sidons, que·l fai uiure ;
IX		Clama li per gran merce
		qu’aprenda·l uers denant nadal,
		s’ab ioy de lui uol uiure.