Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,005 Autor: Joan Esteve Gènere: Pastorela Número: III

 

El dous temps quan la flor s'espan

		LA II PASTORELLA QUE FES JOHAN ESTEVE MCCLXXXII.
I	1	El dous temps quan la flor s’espan
		sus el verjan
		ab la verdor,
		m’anava totz sols delechan
	5	del joy pessan
		que·m ven d’amor.
		En un deves, anhels garan,
		yeu vi denan,
		ab un pastor,
	10	gaya pastorella
		covinent e bella,
		que vesti gonella
		d’un drap vetat belh,
		e·l pastorelh.
II	15	Pres d’elhs me mis en loc rescos,
		que lunhs d’amdos
		no·m poc vezer;
		e·l pastora moc sas razos
		cum gaia e pros,
	20	e dis: «Per ver,
		Gui, mom paire·m vol dar espos
		vielh, raynos
		e ric d’aver».
		«Mal’er la chauzida»,
	25	dis Gui, «si·us marida,
		na Flors, e·us oblida
		selh que per marit
		avetz chauzit».
III		«En Gui, mos cors vos es volvens
	30	quar paupramens
		vos vey estar».
		«Na Flors, paupre jov’es manens,
		quan viu jauzens,
		pus, ses duptar,
	35	que·l vielh ric qu’es tot l’an dolens,
		qu’aurs ni argens
		no·l pot joy dar».
		«En Gui, que que·us aya
		dig, amor veraya
	40	vos port, no·us desplaya,
		que fin cor veray,
		amicx, vos ai».
IV		Del loc don los agui ’scotatz,
		vengui em patz
	45	tro elhs, ses bruy;
		baizan los trobiey abrassatz,
		d’amor nafratz,
		joy entr’amduy,
		Saludiey los, mas ver sapchatz
	50	que saludatz
		per elhs no fuy,
		e·l pastora blonda
		dis, non jauzionda:
		«Senher, Dieus cofonda
	55	qui joc jauzion
		tolh al belh blon».
V		«Na Flors, per que·us desplatz de mi
		mais quez a·n Gui
		quar aissi so?»
	60	«Senher, vos nostres noms cossi
		sabetz aissi?
		Ans, me sap bo».
		«Na Flors, tan pres era d’aissi
		que·ls noms auzi
	65	e la tenso».
		«Senher, no·y fo facha
		folhors ni atracha».
		«Toza, qui s’en gacha,
		de ben fay atrag
	70	qu’a tostemps fag».
VI		Ma razo retracha,
		ses tota empacha
		parti·m de lur pacha;
		non lur fi empag
	75	pus, ni retrag.
VII		En Guillem a facha,
		de Lodeva gacha,
		de valor antracha,
		per qu’ieu s’onor gach,
	80	Belh Ray — be fag.