Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,009 Autor: Joan Esteve Gènere: Pastorela religieuse Número: IV

 

Ogan, ab freg que fazia

		VAQUIEYRA QUE FES JOHAN ESTEVE MCCLXXXVIII.
I	1	Ogan, ab freg que fazia
		en la chalenda d’abril,
		d’Olargue pel boy venia
		sols cavalgan tost e vil;
	5	e vi de pres d’un cortil
		vaquieyra
		ab una vaca sotil
		ez ab so vedelh,
		que gardava;
	10	ez horava
		mout devotamens,
		e bayssava
		e levava
		quo fay contenens.
II	15	Ves lieys tengui dreg, l’estrada
		laissiey e mon dreg cami.
		Quan me vi·l gen faissonada
		venir, sa razo feni.
		Saludiey·l, ez elha mi,
	20	la genta,
		e·m senhet e·m benezi
		co ssi mort me vis.
		«Toza cara,
		que·us fai ara
	25	si me benezir?»
		«Senher, car a
		vostra cara
		semblan de murir».
III		«Toza, vos qu’etz plazenteira,
	30	no·m digatz mon desplazer,
		qu’ie·us port amor vertadeira:
		siatz ab me d’un voler».
		«En Dieu aiatz vostr’esper,
		que vida,
	35	senher, no·us conosc per ver:
		membre·us de la mort».
		«Toza, gaire,
		per mom paire,
		vos no·m conortatz».
	40	«Senher fraire,
		a mal aire
		us vey, de que·m desplatz».
IV		«Vos m’en guerretz leu, na Toza,
		si m’autreyatz vostr’amor».
	45	«Senher, de Dieu suy espoza,
		qu’ieu no vuelh autre senhor».
		«Toz’, an vos facha Menor
		bechina?»
		«Senher, pel rey qu’ieu azor,
	50	non, mais per mon cor
		vuelh servire
		tro·l fenire
		aquelh que per nos
		volc suffrire
	55	ab martire
		greu mort en la cros».
V		«Quar servir Dieu vos agensa,
		Toza, n’ai gran alegrier».
		«Senher, mortz me fai temensa,
	60	q’uey non es vius qui u fo yer,
		q’us non sap jorn vertadier
		ni hora;
		e pert lo dous gaug entier
		qui mor en peccat».
	65	«Toza gaya,
		a Dieu playa,
		si quo·l mon soste,
		que savaya
		mortz no·s traya».
	70	E viriey mo fre.
VI		Con que vaya,
		Guilem gay a
		de Lodev’ab se
		pretz qu’esmaya
	75	gen savaya,
		e·ls valens mante.
VII		Mom Belh Ray a
		ta veraya
		beutatz qu’om non cre,
	80	sol que l’aya
		vista, n’aya
		tan lunh’autra re.