Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,004 Autor: Joan Esteve Gènere: Planh Número: VI

 

Co ssi moria

		PLANCH QUE FES JOHAN ESTEVE L’AN MCCLXXXIIII
I	1	Co ssi moria
		suy trebalhatz,
		no say que·m dia,
		pus qu’enrabiatz,
	5	tan me laguia
		li mortaldatz
		que·s fetz lo dia
		de Caritatz,
		quar plors
	10	peiors
		no foron vistz,
		dolors
		maiors
		ni cors pus tristz;
	15	per qu’ieu suy dolens
		e mans d’autras gens;
		Dieus lur er guirens
		cum als ignoscens.
		Verges Maria,
	20	si quo venc en vos,
		pregatz lo·n pia
		qu’els salve e nos.
II		Mai non cre sia
		le dans ploratz
	25	ni·l tristicia
		dels turmentatz.
		Qui que·ls vezia
		marturiatz
		ab dol, avia
	30	dins sos pessatz
		tristors,
		languors
		pus que marritz.
		Secors,
	35	amors
		de Dieu er guitz
		d’elhs e mundamens
		de lurs fallimens,
		e lai defendens
	40	dels percussiens.
		Verges Maria,
		[si quo venc en vos,
		pregatz lo·n pia
		qu’els salve e nos].
III	45	Mort, ab bauzia
		nos as raubaz,
		qu’en aital guia
		n’ajas menatz:
		ses malautia,
	50	non cofessatz.
		Las, qui·n poiria
		viure pagatz?
		Ranquors
		peiors
	55	nos n’an feritz;
		senhors,
		de cors,
		grans e petitz,
		nos qu’em sai vivens
	60	preguem humilmens
		rey dels elemens
		qu’elh lur er gandens.
		Verges Maria,
		[si quo venc en vos,
	65	pregatz lo·n pia
		qu’els salve e nos].
IV		Selh que volria
		esser salvatz
		ab Dieu deuria
	70	estar comtatz,
		pueys no seria
		per mort soptatz,
		Mar autra via
		teno·ls malvatz
	75	trachors,
		qu’errors
		an enriquitz.
		Pavors,
		temors
	80	d’aquels raubitz
		lur es dregz niens;
		Dieus n’er punimens,
		als passatz suffrens
		dous e paciens.
	85	Verges Maria,
		si quo venc en vos,
		[pregatz lo·n pia
		qu’els salve e nos].
V		Si be·ns envia
	90	Dieus temps torbatz,
		mortz, dolentia,
		de qu’em iratz,
		petit embria,
		ans malvestatz
	95	mai·s multiplia
		deves totz latz,
		Menors,
		melhors
		sai son aunitz.
	100	Honors,
		ricors
		vol hom; giquitz
		n’es Dieus veramens
		e sos mandamens,
	105	Elh er salvamens
		als mortz soptamens,
		Verges Maria,
		[si quo venc en vos,
		pregatz lo·n pia
	110	qu’els salve e nos].
VI		Guillem qu’es valens
		de Lodev’al mens
		prec Dieu dels mortz pens,
		e·l Ray eyssamens.
	115	Verges Maria,
		si quo venc en vos,
		[pregatz lo·n pia
		qu’els salve e nos].