Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,006 Autor: Joan Esteve Gènere: Sirventes Número: VIII

 

Francx reys frances, per cuy son angevi

		SIRVENTES D’EN JOHAN ESTEVE MCCLXXXVI.
I	1	Francx reys frances, per cuy son angevi,
		picart, norman, breto d’una companha,
		e leones, ez aquels de Campanha,
		e mans d’autres qu’ieu no sai dire qui,
	5	senher, fontaina de tot be,
		si del pros Guillem vos sove
		de Lodeva, gay, gen parlan,
		pus viu l’an pres, no·y aura dan.
II		Reys de vertut, reys que cassa ez auci
	10	deslialtat ez ab drechura·s banha,
		etz vos doncx reys drechuriers; no·lh sofranha
		la vostr’amors, senhers, cum li falhi
		la falsa gens senes merce
		que·l trahiro aissi quo fe
	15	Judas Dieus beven e manjan,
		don planc, si tot no fas semblan.
III		Sobiran rey dels autres reys, aissi
		cum vos cassatz malvestatz, cre que·us tanha
		que fassatz drech d’aquels, que Dieus contranha,
	20	quar falhiro ab vil cor flac mesqui
		al pro Guillem qu’a pretz ab se.
		Senher, faitz d’els so que·s cove,
		que, si·n prendetz venjamen gran,
		tug l’autre mellor vo·n seran.
IV	25	Tug li autre vos n’auran cor pus fi
		si faitz d’aquels tal fag que quecx s’en planha,
		quar devers es, qui son jornal gazanha,
		quez om lo·n pac segon qu’el jorn servi.
		Doncx, lials reys, pagatz los ne
	30	si co n’an gazanhat dese,
		que·n perdo·l cors e so quez an;
		e segra vo·n laus derenan.
V		Honorat reys part totas honors, si
		la vostr’amor no·lh val, lay crey remanha
	35	lo pro Guillem, ez er dolors estranha
		del franc cortes per cuy paratges ri
		que siey amic no·lh valon re.
		Doncx, lials reys, faitz vos per que
		lo cobrem, no·y anetz tarzan,
	40	que·l jorn que no·l vey m’es un an.
VI		Francx reys, valha·l la bona fe
		qu’elh vos a portada ancse;
		breumen, si·us platz, faitz per elh tan
		que n’ajon gaug cylh [que] dol n’an.