Vatteroni, Sergio. Le poesie del trovatore Johan Esteve. Pisa: Pacini, 1986.

Codi: 266,010 Autor: Joan Esteve Gènere: Planh Número: XI

 

Planhen ploran ab desplazer

		PLANCH QUE FES JOHAN ESTEVE D’EN G. DE LODEVA L’AN MCCLXXXIX.
I	1	Planhen ploran ab desplazer
		ez ab gran trebalh, las, qu’ieu ay,
		fenisc mon chan, quar re valer
		no·m poiria negus temps mai;
	5	e vuelh que gaug parta de me,
		pus mortz a partit d’aquest mon
		en Guillem de Lodeva, de
		que·m venia joys jauzion.
II		Mortz, menat n’as selh qu’em poder
	10	avia pretz fi e veray,
		e sabia far son dever
		mielhs que lunhs que·n remanha sai,
		e mielhs so qu’a valor·s cove,
		e mielhs bos faitz de cor volon,
	15	per que aitan, quan me·n sove,
		ai piegz que selh qu’om viu rebon.
III		E qui sabra mais mantener
		proeza tam be? Non lo· y say,
		quar aquilh quez an mais d’aver
	20	son pus cobe e pus savay;
		tot quant es e mi eys menscre
		quar moron aquilh qui bos son
		e·ls malvat vivon, Dieus, per que
		tan de dol n’ay que·l cor mi fon.
IV	25	Esta terra·n val menhs per ver
		per sa mort e so qu’als pros play:
		dos e condugz e sostener
		los paupres en lur gran esmay
		ez aver de forfag merce.
	30	Mala mort, tu as frag lo pon
		don venian tug aquest be,
		e menat l’as, yeu no say on.
V		Que m’enanso miey malsaber
		que negus temps mais no·l veyray?
	35	Ailas!, e tan greu desplazer
		del franc gent noyrit que faray?
		Dieus li perdo, que·l mon soste,
		e·lh done l’ostal deziron
		on so·ls apostols pres de se,
	40	e·l gaug perdurable d’amon.
VI		Maire de Dieu, fons de merce,
		la tua grans bontatz l’aon
		e·l meta lay on an ab te
		las verges gay joy jauzion.