Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Codi: 097,007=364,034 Autor: Blacatz, Peire Vidal Gènere: Tenso Número: IV

 

Peire Vidal, pois far m'aven tensson

		En Blacatz e’n Peire Vidals.
I	1	Peire Vidal, pois far m’aven tensson,
		No·us sia greu s’ie·us deman per cabal
		Per cal razon avetz sen tant venal
		E mainz affars, que no·us tornon a pron,
	5	Et en trobar avetz saber e sen ;
		E qui ia vieills en aital loc aten
		Et en ioven n’es atressi passatz,
		Meins a de ben que si ia non fos natz.
II		Blacatz, non teng ges vostre sen per bon
	10	Car anc partitz plaich tant descomunal,
		Q’ieu ai bon sen e fin e natural
		En totz affars, per qe·m par ben qui son,
		Et ai m’amor messa e mon ioven
		En la meillor et en la plus valen ;
	15	No·n vuoil perdre los guizerdos ni·ls gratz,
		Car qui·s recre es vilans e malvatz.
III		Peire Vidal, ia la vostra razon
		Non vuoill aver ab midonz, que tant val,
		Que·ill vuoill servir a totz iorns per engal,
	20	E d’ela·m platz qe·m fassa guizerdon,
		Et a vos lais lo lonc atendemen
		Senes gauzir, qu’eu vuoill lo gauzimen ;
		Qe loncs atens senes ioi, so sapchatz,
		Es iois perdutz, c’anc uns no·n fon cobratz.
IV	25	Blacatz, non sui eu ges d’aital faisson
		Cum vos autre, a cui d’amor non cal ;
		Gran iornada vuoill far per bon ostal
		E lonc servir per recebre gent don.
		Non es fins drutz cel qe·is camia soven
	30	Ni bona dompna cella qui lo consen ;
		Non es amors, anz es engans proatz
		S’uoi enqueretz e deman o laissatz.