Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,019a Autor: Peire Bremon Ricas Novas Gènere: Canso Número: II

 

Un sonet novel fatz

I	1	Un sonet novel fatz
		per joy e per solatz ;
		e non es ges mos gratz,
		mas qar als adregz platz ;
	5	que si no·n fos blasmatz
		non chantera mais re,
		pus vey q’umilitatz,
		ni pretz, ni amistatz
		ab mi dons pro no·m te.
II	10	Grans mals n’ai sofertatz,
		fis amans non amatz ;
		a las horas ai patz,
		maynhtas vetz sui iratz ;
		be·n son apoderatz,
	15	qu’estat n’ai, per ma fe,
		cum hom desesperatz
		be·n a dos ans passatz,
		e ges no me·n recre.
III		Ges, segon los pluzors,
	20	fenhens galiadors,
		non amarai alhors,
		sia sens o folhors ;
		tant es grans sa valors
		e·l beutatz qu’a ab se,
	25	qu’ilh es miralhs e flors
		de totas las melhors,
		al jutjamen de me.
IV		Mout mi ten car Amors
		son pretz e sas valors,
	30	e·ls guazardos aussors ;
		mas pro·m dona dolors,
		pauc mi fai de socors
		e d’ajud’e de be,
		meyns qu’a totz amadors ;
	35	estiers quar m’es honors
		qu’ades mi ten ab se.
V		Domna cueynhd’ab cors guay,
		on joys e pretz estay
		mais q’ieu no dic ni sai,
	40	vos am mais que·us dirai ;
		mas autre pro non ai :
		a suffrir me cove ;
		doncs me·n conortarai
		enaissi cum poirai
	45	ab lo mal que me·n ve.
VI		Chansos, quant seras lai,
		mon cossir li retrai,
		e di li per qu·em fai
		morir en tal esmay ;
	50	pueys te comandarai,
		si s’azauta de te,
		tro ins el cor li vay,
		qu’adoncs hi trobarai
		ben leu mais de merce.
VII	55	Domn’ab ... pretz verai,
		ja mais no·us prejarai,
		s’eras no·i trop merce.