Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,021 Autor: Peire Bremon Ricas Novas Gènere: Canso Número: IV

 

Us covinens gentils cors plazentiers

I	1	Us covinens gentils cors plazentiers,
		miralhs e flors de dompnas e d’amor,
		mi fai chantar e·m tolh ir’e dolor,
		que·l sieus gens cors, don mi creys deziriers,
	5	m’a doussamen vencut, lassat e pres ;
		e, si no·m val chauzimens o merces,
		non say castelh en que·m puesca gandir :
		preyar non l’aus, ni no me·n puesc giquir.
II		Qu’aissi·s de mi cura dels ricx soudadiers,
	10	que van sercan lonjamen bon senhor,
		tan tro·l trobon tal que·ls val e·ls socor,
		et es leyals senhers e dreituriers.
		Tot atressi ai sercat trenta mes,
		qu’anc non trobiey dompna mais que·m pla-
	15	tant cura vos faitz, cuy apelh Belh Dezir, [gues
		don puesc totz bes dire senes mentir.
III		Belha dompna, humils e vertadiers,
		francx e leyals, ses cor gualiador,
		sopley vas vos, cuy yeu am et azor,
	20	e suy vostres liges e domesgiers ;
		a vos m’autrey, qar etz la genser res
		e la mielhers qu’anc de maire nasques ;
		e, quar no·m puesc de vos amar suffrir,
		per merce·us prec que no·m layssetz morir.
IV	25	Aissi cum selh que desrengua premiers
		en bon torney et abat lo melhor,
		qu’al partir n’a tot lo pretz e l’onor,
		avetz lo pretz dels avinens mestiers ;
		e, quar avetz mi e bon pretz conques,
	30	re no·us dernan, mas aitan que·us plagues
		que·us puesc’amar et honrar e servir
		e vostre pretz creysser et enantir.
V		E, quar no·us suy del deman sobransiers,
		bona dompna, en dreg vostra ricor
	35	devetz gardar ; si auretz mais d’onor
		si·m faitz plazer, que s’ieu fos tan leugiers
		que·us demandes so que de mi non es ;
		mas empero sapchatz qu’ieu non dic ges
		que totz plazers non saubes far grazir
	40	e vos celar e lauzar e jauzir,
VI		Belhs Deziriers, ad Amor ren merces,
		quar mon fin cor a del tot en vos mes,
		e quar m’a fag gent en dompna venir,
		si tot m’a fag trop ponhar al chauzir.