Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,002 Autor: Peire Bremon Ricas Novas Gènere: Canso Número: V

 

Ben deu istar ses gran joi totz temps mais

I	1	Ben deu istar ses gran joi totz temps mais
		cell qui no·s pot partir de son seinhor,
		qan per servir non pot aver s’amor,
		ni no ha cor qe del servir se lais ;
	5	piez irai de priço
		e plus greu martire ;
		qan ses gizardo
		serv, e qe s’albire
		qe bes ni graz no·l n’eschaia,
	10	be m’ es semblan qe mal traia.
II		E totz seinhers deu estar en pantais,
		qan sap qe·l sieu han gaug s’el pren honor,
		si no los creis e no·n lur ten amor,
		pos lo servon de bon cor ses biais ;
	15	qar seinhor fello
		tainh qe Dieus azire,
		qant ha, ses razo,
		cor de·ls sieus aucire ;
		ez er greu qe non deschaia
	20	qi·ls sieus destrui ni esmaia.
III		Tot aisso dic con fins amics verais
		per ma donna, e non fas ges clamor ;
		q’ab tal plazer sai dezirar s’amor
		qe jauzentz sui d’aisso q’autres s’irais ;
	25	q’a mi saupra bo,
		s’ill mi deinhes dire,
		per merce, de no
		del joi q’ieu dezire ;
		qar ja non er q’a leis plaia
	30	q’ieu mon dezir li retraia.
IV		Anc ren no·m det, ni·m promes, ni m’estrais,
		n’ieu no lo·l qis ; anz mi fai tal paor
		q’ieu no·il aus dir con li tenc fin’amor,
		ni ja null temps no m’ensira del cais
	35	s’ill no me·n semo,
		ni ai cor qe·m vire
		per dan ni per pro
		ni per nuill cossire ;
		q’ab un dous desir m’apaia
	40	qar aus dezirar q’il m’aia.
V		En ma donna non tainh ni mens, ni mais,
		e pares be a sa vera valor
		qez ill tem Dieu e Dieus li ten amor,
		qar anc non fes re mas aqo qe tais ;
	45	per q’en luec de do
		jauzisc, qan remire
		sa plaisen faisso,
		si tot me·n suspire ;
		q’ieu non vueilh re qe·l sostraia
	50	sa vera valor veraia.
VI		Tan m’es bel e bo,
		qan ieu li remire
		la boc’ e·l mento,
		qe d’un dous dezire
	55	viu joios, si tout m’esmaia,
		qe·l plasentz vesers m’apaia.
VII		Nulls lausengiers non m’esmaia,
		antz prec Dieu toutz los deschaia.