Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,001 Autor: Peire Bremon Ricas Novas Gènere: Canso Número: IX

 

Ben dey chantar alegramen

I	1	Ben dey chantar alegramen,
		que·l dous dezir me·n son aiziu
		del ric, sobronrat senhoriu
		don tenh lo cor, e·l cors, e·l sen ;
	5	e qui que·n cosselh ni·n quil,
		d’amar vos suy el dreg fil
		don ja no·m partray ;
		qu’ab fin cor verai
		vos mi diey tot, dompna, per ver,
	10	la genser qu’ieu puesca vezer.
II		Dompna, tug belh captenemen
		son el vostre gen cors aiziu,
		el honrat quar pretz senhoriu ;
		e·l vostre fag son d’avinen,
	15	e·l dig plazen et humil
		ab guay solatz e gentil.
		Ay, quora·us veyray ?
		Gran enveya n’ay ;
		pero, si tot no·us dic plazer,
	20	anc re no fetz tam belh vezer.
III		Anc del vostre belh cors plazen,
		si tot miey huelh no·us son aiziu,
		pus fuy el vostre senhoriu,
		pueyssas non aic demembramen ;
	25	e quar dic ver e non guil,
		meravillaran se·n mil ;
		plus non despondray,
		mas vos sabetz lay
		qu’ieu suy sai el vostre poder
	30	ab dezir gran de vos vezer.
IV		Mout mi desmentis dossamen,
		una vetz qu’ieu·s era d’aiziu ;
		per que del honrat senhoriu
		pueys non parti mon ferm talen,
	35	que tot mon cor hi apil ;
		si qu’en may ni·l temps d’abril
		gran joy non auray ;
		quar ges no s’eschai
		qu’en Pascor deya joy aver,
	40	si doncx no·us anava vezer.
V		Fals lauzenjador maldizen,
		de totz mals siatz vos aiziu,
		et hieu dei honrat senhoriu
		que·m ten mal vostre grat jauzen ;
	45	trop cujatz esser sotil
		d’aquel vostre mestier vil ;
		mas una me·n play
		que totz vos dechay ;
		e quar avetz tan croy saber,
	50	l’auzir perguatz vos e·l vezer.
VI		Nulh temps non aigui pro lezer,
		bona dompna, de vos vezer.