Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,006 Autor: Peire Bremon Ricas Novas Gènere: Sirventes (de réponse) Número: XVIII

 

En la mar major sui e d'estiu e d'invern

I	1	En la mar major sui e d’estiu e d’invern
		e sai tant de la mar per c’adreich me govern,
		e ja guerriers q’ieu aja non cuich qe·m descazern
		de la mar que doutz m’es e no·m part de l’estern,
	5	e lausengadors ren als diables d’enfern,
		q’ieu no·ls tem ni no·ls blan una rusca de vern,
		q’eu·n sai un qe·is nafret tant laich, qan feiz l’esqern,
		no l’en gerrion tuich li metge de Salern.
II		Mas ar vei q’al Sordel es pojat sus el cap
	10	ab los sieus sirventes dont fai tan gran aclap,
		ben par c’ab broc los vers e qe·ls mesc’en enap ;
		pero tuit semblan motz siei dit aprop en cap.
		E pos tant arditz es, Dieus don q’el no m’arrap,
		q’el fetz tal ardimen q’entre·ls Lombartz non cap,
	15	e·ls baros conois totz de Trevis tro a Gap,
		e pois d’aqels d’Espaigna trop conois e trop sap.
III		En Sordel vuoill pregar, car ditz q’es mos amics,
		que si·m faill En Barrals ni·m ven tant grans destrics,
		que m’enseing on tenrai, car sap totz los abrics ;
	20	mas no·m mand ad aquel que fo sos enemics
		que la mula no·il det, dond el fo tant enics ;
		mout la·il ques francamen, mas no·il en valc prezics
		mas dels autres dos ac qan venc d’Espaigna rics
		et apres en Peitau cum dav’En Savarics.
IV	25	Anc En Sordels non fo, que ten hom per rainart,
		cavalliers, per ma fe (so·m dis ad una part
		Joanetz d’Albusson — s’el ditz ver, el s’o gart —) ;
		mas si d’entre·ls Lombartz fos el issitz plus tart,
		ja mais a Cananillas non feira far issart ;
	30	e si ben si feing drutz, fols es qui l’en regart,
		que s’aisi son tuit freich cum el l’autre Lombart,
		non son bon ad amor, que mos Rainiers m’en part !
V		Anc mais nuill temps, so cre, tant non nivet ni ploc
		pois q’ieu fui entaulatz, del joc d’amor no·m moc ;
	35	anz sai ab cavallier gen jogar et ab roc,
		et anc nuills hom sa dompna genseis gardar non poc.
		Mas En Sordels joguet a guisa de badoc,
		qan si mezeis aduis e la fersa el deroc ;
		adoncs fon del joc matz, qe·is vestic de laich floc,
	40	e puois del joc d’amor non saup mais tener toc.
VI		Del seignor de Leon dis aquel mal que poc
		En Sordels, tan l’es greu, qand qer, c’om no·l ditz d’oc.