Boutière, Jean. Les poésies du troubadour Peire Bremon Ricas Novas. Toulouse - Paris: Édouard Privat - Henri Didier, 1930.

Codi: 330,014 Autor: Peire Bremon Ricas Novas Gènere: Planh (de réponse) Número: XX

 

Pus partit an lo cor En Sordel e'N Bertrans

I	1	Pus partit an lo cor En Sordel e’N Bertrans
		de l’adreg En Blacas, plus non me suy clamans ;
		yeu partiray lo cors en mantas terras grans.
		La[y] un cartier auran Lombartz et Alamans,
	5	e Polha e Rossia e Frissa e Braymans ;
		trastut vengan en Roma adhorar lo co[r]s sans ;
		e fassa·y tal capela l’emperayre prezans
		on pretz sia servitz, joys e solatz e chans.
II		L’autre cartier auran Franses ab Bergonhos,
	10	Savoy’e Vianes, Alvernhat ab Bretos,
		e·l valen Peytavi, car lor platz messios ;
		e si·lh coart Engles y fan cofessios,
		no son tan malastruc que pueys no·ls trop hom bos ;
		que·l cors sans es pauzatz en loc religios,
	15	e·l reys cuy es Paris gart lo be dels bricos
		ab sen et ab largueza, qu’enaysi sera bos.
III		Lo ters cartier auran li valen Castelan,
		e vengan l’azorar Gascon e Catalan
		et Aragones, car an fin pretz e prezan ;
	20	e si·l rey[s] de Navarra y ven, sapcha de plan,
		si non es larcx e pros, jes del cors no veira[n] ;
		que·l bos rey[s] Castelan[s] lo tenra en sa man,
		que donan e meten lo cors san gardara[n],
		c’aysi renhet sos avis ab fin pretz sobeyran.
IV	25	Lo cart cartier aurem nos autri Proensal,
		car, si·l donavam tot, trop no·n penria mal ;
		e metrem l’a San Gili, com en loc cominal ;
		e vengan Roergal e Tolzas atretal
		e silh de Bederres, si volon pretz cabal ;
	30	c’ueymay auran li comte patz ab amor coral,
		e gardara·s cascus, per mon vol, a son sal,
		car grans cortz mentauguda ses donar res no val.
V		La testa del cors san trametray veramen
		lay en Iherusalem, on Dieus pres naysemen,
	35	lay al Saudan del Cayre, sol pren batejamen,
		e prezenti·l la testa ; may estiers la·y defen ;
		e Gui de Guibelhet, car a fin pretz valen,
		garde be la vertut per la payana gen ;
		e si·l reys d’Acr’y ven, lays cobeitat d’argen,
	40	e sia larcx e pros, e gart ben lo prezen.
VI		Pus Dieus a preza l’arma d’En Blacas francamen,
		say serviran per luy man cavayer valen.