Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,003 Autor: Elias de Barjols Gènere: Canso Número: II

 

Amors, que vos ai forfag

I	1	Amors, que vos ai forfag
		o per qual desastre·m ve,
		que la belha qu’am mais que re
		..... mi mostr’ orguelh e m’aucia ?
	5	Vos o faitz tot quar vos platz qu’aissi sia.
		Pero, amors, tan m’avetz fag doler
		qu’assatz es mais avinen, si·us plazia,
		que·m fezessetz contra·l maltrag aver
		de ma belha dompna un belh plazer.
II	10	Quar, si deziros de benfag
		muer, retrag vos sera iasse ;
		qu’ieu guerir pogr’ab pauc de be :
		cum sofraitos que non a manentia
		a cuy grans ops bona vida seria,
	15	auria pro sol que pogues vezer,
		amors, que vos entre tostemps un dia
		accetz en lieys qui m’auci tal poder
		que·l fezessetz en grat mos precx tener.
III		Mas, no·us platz que·us sia retrag
	20	qu’ieu aya tan de ioy ab me
		de lieys que·m trebalhet ancse,
		quar m’a trobat ferm en sa senhoria.
		Pero, per pauc non dic que dreg auria,
		quar, si be·m planh, be·m membra qu’un dous ser
	25	mi det, dont es dregz si mals m’en venia,
		quar no saubi l’onrat ioy retener ;
		donc, quant ieu dic que no·m det, non dic ver.
IV		Tan m’a dat per que·us quier son plag,
		amors, si tot lieys non cove,
	30	don dols e vergonha·m rete,
		quar l’ai passat son coven ; qu’ieu l’avia
		e degr’ esser la magers cocha mia ;
		... qu’ anc, pus m’ac fag de men ric parer,
		non torniey lai ; guardatz, qual vilania !
	35	que, quant ylh m’ac pauzat en bon esper,
		ieu m’en fugi, e degra remaner.
V		... Ben conosc que fols ai fag,
		mas mi reconosc, so cre ;
		quar fols hom a greu sen ab se
	40	tro sa foudatz lo maca e·l castia ;
		castiatz suy, si ma dona·s volia ;
		mas non aus dir qu’ilh o deya voler,
		pero sos sens, sos pretz, sa cortezia,
		l’umilitatz qu’ilh a e·l ric saber,
	45	si es vers que res mi valha, ·m deu valer.
VI		Mon Ses-Enjan vey totz iorns mais valer
		en Sanhtongier, per qu’am la senhoria,
		que qual que·s lays baissar ni decazer,
		els an bon cor de bon pretz mantener.