Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Codi: 076,012 Autor: Bertran d'Alamanon Gènere: Planh (de réponse) Número: XV

 

Mout m'es greu d'En Sordel, car l'es faillitz sos senz

I	1	Mout m’es greu d’En Sordel, car l’es faillitz sos senz,
		Qu’eu cuidava qu’el fos savis e conoissenz ;
		Era sui en mon cug faillitz, don sui dolenz ;
		Car tan onrat condug don’a tan avols genz
	5	Con lo cor d’En Blacatz, qu’era sobrevalenz.
		Aora lo vol perdre, en que faill malamenz,
		C’aissi cum pert aquest, en perdria cinc cenz ;
		Mas ia no·i er perduz entrels flacs recrezenz ;
II		Que las dompnas valenz lo partran entre lor
	10	Et en loc de vertuz lo tenran per s’onor.
		E midonz de Proenza, car a de pretz la flor,
		Prena·n premieiramenz e·l gart per fin’ amor.
		Pueis midons de Bearn, car a vera valor,
		Voill qu’en prend’ atresi tan qu’en torn la dolor
	15	Qu’il aura de sa mort, en gaug et en dousor,
		Car tostemps enanset son pretz e sa lauzor.
III		La comtessa prezans dompna de Vianes
		Voil que prenda del cor, pos a bon pretz conques ;
		E gart lo ben e gen per la vertut que·i es,
	20	E penra·l tostemps ben, si·l gard’, en totas res.
		E·l bella de la Chambra, en cui sera ben mes,
		Voil qu’en prend’ atressi, pos a totz autres bes,
		E gart lo enaissi com fai son cors cortes,
		E no·l pot miels gardar, al laus dels ben apres.
IV	25	Na Guida de Rodes prenda del cor, car fai
		Sos bes grazir als pros e car toz bes li plai ;
		E gart lo ben e gen, car ad ella s’eschai,
		Que, si tot il val pro, tostemps en valra mai.
		Na Rambauda del Baus prenda del cor assai,
	30	Car il es bell’e bona et a bon pretz verai,
		E gart lo ben e gen, car tot quan gen l’estai
		Garda, salvan s’onor e son plazen cors gai.
V		Sil de Lunel, car a verai pretz cabalos,
		Voil que prenda del cor, c’aissi·s taing per ambdos,
	35	Car ill es bell’ e bona e·l cors plazens e bos,
		E gart lo ben e gen et aura·n grat dels pros.
		Pueis voil que del cor prenda la bella de Pinos,
		Car il es bell’ e bona et a plazenz faissos,
		E gart lo enaissi, car sos cors amoros
	40	Tenra·l vertutz del cor tostemps gai e joios.
VI		De l’arma d’En Blacatz pes Dieus lo glorios,
		Que·l cors es ab aquellas de qu’el er’ enveyos.
VII		Bell’ Esmenda plazens, sol que Dieus mi sal vos,
		Cui que plass’ o que pes, tostemps viurai joios.