Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,006 Autor: Elias de Barjols Gènere: Canso Número: IX

 

Bon' aventura don Dieus

I	1	Bon’ aventura don Dieus
		a mos huelhs et a mon cor,
		quar an la gensor chauzida
		del mon e la plus avinen ;
	5	e no·y menti, mon escien,
		ans sai e conosc que vers es ;
		qu’enaissi·m venha de lieys bes
		cum ieu cug y ver dire,
		e si eu men, ia no·n sia iauzire.
II	10	E pero vuel esser sieus
		lialmen e de bon cor,
		quar es la plus yssernida
		e ia non trobara conten
		de beutat ni d’ensenhamen,
	15	ans puesc ben dire : que sieus es
		qu’e·l plus ric senhoriu s’es mes
		qu’en tot lo mon se mire,
		per qu’ieu li suy leyals hom e servire.
III		Si totz lo mons era mieus,
	20	no·n auria gaug mon cor
		ses lieys que tant es grazida,
		cuy am e dezir finamen ;
		e si erguelh ni falhimen
		fas, quar la prec ni·l clam merces,
	25	ia·l sieu gen cors guai e cortes,
		s’a luy plai, no·s n’azire
		qu’al fol deu hom sas foldatz laissar dire.
IV		Si tan gen muri Andrieus
		non amet miels en son cor
	30	qu’ieu fas lieys qu’ai encobida ;
		no sai si·m fas foldat o sen
		quar en tan honrat loc enten ;
		per Dieu, amors, si foldatz es,
		me perdonatz : est nescies,
	35	qu’ie·m laissari’ aucire
		ans que·n partis mon cor ni mon dezire.
V		Nulhs afans no m’en es grieus,
		tan la dezir e mon cor !
		E quar tan l’aurai servida,
	40	prec li per son belh chauzimen,
		si paratges la·n defen,
		q’umilitatz la·n retengues,
		qu’amors m’a si lassat e pres
		que no sai on me vire
	45	ni no sai ieu de que me puesca rire.
VI		Chanso, la comtessa valen
		de Savoia, on fin pretz es,
		me saluda, e·l pro marques,
		e sapchas li ben dire
	50	que·l genser es qu’en tot lo mon se mire.