Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Codi: 124,017 Autor: Daude de Pradas Gènere: Canso Número: VIII

 

Tan sen al cor un amoros desir

I	1	Tan sen al cor un amoros desir,
		q’i an mei oill novellamen aissis,
		qu’ieu non voill ges esser en paradis
		per so que mais non pogues car tenir,
	5	lai on Beltatz e Jovens seignoreia
		e tot acho q’az Amor plaser deia ;
		q’el mon non es nuils hom tan malenans,
		lai non tornes joios e benestans.
II		Be·m saup Amors onrar et enrequir,
	10	qar anc deignet voler qu’eu m’enardis
		tan que penses que ma dompna suffris
		qu’eu l’esgardes dreitz huoills al departir.
		Ben sai que ja no·n aurai mas l’enveia
		que la ho uol . . . . . . . . . .
	15	e me consen sos amoros semblans,
		be·l cuig mostrar qals es totz mos talans.
III		Be·s fai a dir, so·m cuig ; car afortir
		no·s deu om ges, puois Amors l’a conquis ;
		qar plus vencutz es cel qui s’afortis
	20	qe cel qe sap humilmen obedir.
		Donc ben es fols qui ab Amor guerreia ;
		qar saber pot, si Merces no·il plaideia,
		a soffrir l’er sos mals e sos afans
		tan cum volra cil de cui es lo dans.
IV	25	Ja, se·m volgues mi dons del tot ausir,
		non cuig tan gen m’onres ni m’acuillis,
		ni siei bel oill amoros plen de ris
		non aneron tan dousamen ferir
		mon cor, qe·s ten a leis totz e s’autreia
	30	e parl’ab leis e solatz’e dompneia,
		tot atressi cum s’eu l’era denans
		e m’agues pres per amic en baisans.
V		Dompna, vostr’om sui per far e per dir.
		Tot can volres per ma fe vos plevis ;
	35	e se·m prendes per tal com ie·us m’ofris,
		ja Deus no·m don poder c’aillors m’en vir!
		Ai, douza res, cui ador’e sopleia
		Prez a Valors e tot qan es merceia,
		voillatz, si·us platz, qe·us retraia mos chans,
	40	con eu vos sui e serai fis amans.
VI		A mon amic, qe fai meils tot qan deia
		de nuil baro qez hom auda ni veia,
		t’en vai, chansos, e sias li membrans
		qe maintas vez val mais uns jorns q’uns ans.