Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Codi: 124,008 Autor: Daude de Pradas Gènere: Canso Número: XVI

 

De belh dezir que Joys Novels m'adutz

I	1	Del bel dezir que Joys Novels m’adutz
		farai un vers, qu’er luenh et pres auzitz,
		e per leyals amadors ben grazitz,
		que ia per autres non er entendutz ;
	5	quar ges no·s tanh que bos chans ni guays motz
		tals quon amors los m’essenha trastotz,
		sapcha nuls hom, si non ama bon pretz.
		Non l’aprendatz, lausengiers, que fondetz,
		quan dompna pros, en cuy renha beutatz,
	10	vol far ni dir en ren sas voluntatz.
II		Non sap que·s fai fols gelos esperdutz
		quan se combat. Noy a pro s’es maritz,
		e per honor de sa moler servitz ;
		se plus enquier, per bon dreg n’er cornutz,
	15	e valgra mais fos neguatz en un potz ;
		que el meseus pro es qu’era cogotz.
		Anz, s’on loi ditz, deu dir : « D’aquo·s tolletz.
		No m’o faratz encreire s’eratz detz,
		e sobretotz, ensems m’o iuravatz
	20	que anc s’est vist ; ja mais no m’o diguatz. »
III		Ai, fin’ amors, si ia trairai a lutz
		aisso don tant aurai estat marritz !
		Pauc prezera lausengiers et lur critz ;
		anz pogra dir que ben era vengutz
	25	lo iornz e·l temps que·ls avia, de totz.
		En vos m’en fi : encar seran desotz
		li malastruc enuyos que suffretz
		que diguon mal aicel de cui sabetz
		que ia per els no sera castiatz.
	30	Tant vos vei, totz entrepres e lassatz !
IV		E vos, merces, que faitz tan gran vertutz,
		que sol a vos es totz amanz gueritz,
		membre·us de me, e prec que·m siatz guitz,
		quant a mi dons irai rendre salutz.
	35	De part mon cor, qu’estai per lieys en crotz,
		vos l’i deman, qu’en als non es mos votz ;
		quar ben conosc que selhs que mantenetz
		son fin de ioi, qual hora que·us voletz.
		A vos mi ren, qu’a mi dons mi rendatz,
	40	et il amdos retengua nos si·lh platz.