Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 009,015 Autor: Aimeric de Belenoi Gènere: Canso Número: VII

 

Per Christ ! s'ieu crezes Amor

I	1	Per Crist ! s'ieu crezes Amor,
		Tornat m'agr' en la folhor
		En que·m solia tenir :
		Que pe·ls huelhs m'anet ferir,
	5	Quant li obri mon coratge,
		A·l cor, d'un amoros semblan
		Que·m venc d'un guay cors benestan.
		Mas ja mais, s'ab mi no·s jura
		No·i poira intrar segura.
II	10	E pero, tan gran doussor
		Ai a·l cor, d'una honor
		Que·m fes silh — quals non aus dir —,
		Quan me vi de si partir,
		Qu'entrubert tenc mon coratge
	15	Per prendre tal joy, o plus gran.
		Que, quan trays la man de son guan,
		Frays de·l cor la serradura,
		E·i mes per guarda Mezura.
III		Mas puois, quan ieu vinc d'alhor,
	20	Mezura no·y ac valor :
		Qu'ab plazers la·n fes yssir
		Silh que·m pot, si·s vol, aucir,
		E mes si e mon coratge
		Tan fermamen, rizen joguan,
	25	Qu'alre no·l quier, ni no·l deman ;
		Qu'en lieys remirar s'atura
		Mos cors, que d'als non a cura.
IV		Regardan la vey gensor,
		E pensan la truep malhor :
	30	Qu'amar si fai e grazir
		Per vezer e per auzir.
		E si·l met Dieus en coratge
		(Que sol per merce fass' aitan),
		Que·l plassa qu'ieu l'am ses engan,
	35	Merces aura sa dreitura,
		Et ylh amic ses falsura.
V		S'ieu no suy a ssa ricor
		Pro ricx per fin amador,
		Mi pot sivals retenir :
	40	Qu'ieu sai celar e suffrir
		Franchamen, de bon coratge,
		So que tanh a leyal aman,
		E port a lieys honor tan gran :
		S'ab sa ricor la mezura,
	45	Ricors li fara frachura.
VI		A la pro reïna prezan
		T'en vay, chansos, e t'atura,
		Qu'ab lieys tota res melhura.