Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 009,008 Autor: Aimeric de Belenoi Gènere: Canso Número: X

 

Selh que promet a son coral amic

I	1	Selh que promet a son coral amic
		Son servizi, quan lo ve benanan,
		Ni·l perpara, no fa ges esfors gran ;
		(Pero no·n dic qu'azautimens no sia) ;
	5	Mas qui l'amic a·ls grans ops accoria,
		Aisso·m parri' esfortz e benestansa,
		E seria complida l'amistansa.
II		Per vos, dona, que·m promezes, o dic,
		Vostre secors ab amoros semblan,
	10	Qu'ieu m'estava suau e mens d'afan ;
		Aras m'avetz, en fe et en paria,
		Emblat mon cor, e sufretz que m'aucia
		D'un dous dezir plen de desmezuransa,
		Don a mos jorns non partrai m'esperansa.
III	15	En vos se mes, e de me se partic
		Quan vos traixes la blanca man de·l guan,
		E remas lai, mos cors, don' en lian,
		Rics e joyos, en vostra senhoria ;
		E quar de vos no ssi part nueit ni dia,
	20	Hieu muer d'ira, d'envey' e de pezansa,
		Quar ses mi es en tanta benanansa.
IV		Lo braus respos, dona, m'espaoric,
		Que mi fezes, apres d'un belh semblan ;
		Per qu'ieu no·m part de vos, ni· us venc denan :
	25	Qu'em pessan suy ab vos, e si·us vezia
		Vostre bel cors, d'enveya m'auciria.
		Pero, mais vuelh lai murir ses duptansa,
		Que viure sai en tan greu malanansa.
V		Li belh semblan amoros, aut e ric,
	30	E·l dous esguar, e·l franc dig benestan
		De vos, per qu'ieu met autras en soan
		Endreg d'amar, salva lur companhia,
		An dins mos huelhs per meig faita lur via,
		Don m'an emblat lo sen e la membransa,
	35	Per qu'ieu no viu ab joy, mas per semblansa.