Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 009,011 Autor: Aimeric de Belenoi Gènere: Canso Número: XVIII

 

Ja no creirai q'afanz ni cossirers

I	1	Ja non creirai q'afanz ni cossirers,
		Ni greus sospirs, ni plagners, ni plorars
		Ni granz trabails, ni fortz maltraitz sobriers,
		Ni loncs dezirs, pauc durmirs ni veillars
	5	Aion poder de nul home aucir,
		Ni per amor puesca nuls hom murir :
		Car ieu non muer, et mos mals es tant greus,
		Per qu'eu non crei q'anc en muris N'Andreus.
II		Qu'anc nuls amanz ni nuls penedenciers
	10	Non trais lo mal, ni la dolor, ni l'ars
		Qu'eu ai suffert plus de cinc anz entiers
		Per leis, a cui amors ni mercejars
		No·m val, sivals d'aitan, qe no m'azir
		Lo seus genz cors, quar eu m'aus enardir
	15	De leis amar, e voil mais esser seus,
		Que senes leis lo monz sia totz meus.
III		Qar tan m'es dols de leis lo desirers
		Plus qe d'autra lo jazers ni·l baisars,
		Qu'eu m'estauc sai, sos paubres soudadiers,
	20	E·n lais ma terr' e mainz de ries afars ;
		Qar senes leis non puesc rics devenir,
		Mas, si·l plagues, ela·m pogr' enreqir :
		Qalq e ric joi de s' amor mi don Dieus —
		Lo reis Filips tenria pois mos feus !
IV	25	Tant es sos prez verais e drechurers,
		E·l seus gais cors honratz e fins e cars,
		Qi·n parlava semblari' ufaniers :
		Q'aissi con coil totas aigas la mars,
		Sap totz bos prez retener e chauzir ;
	30	Et en tos temps hom non poiria dir
		La gran beutat, ni escriur'en uns breus,
		De·l seu cors clar plus qe roza ni neus.
V		Dona·l vostr'om liges endomengiers
		E·l vostre sers humils en totz honrars
	35	E·l vostr'amics lials e vertadiers,
		Qu'en ben amar no·il her ja trobatz pars,
		Vos qier, per Dieu, destregz ab gran desir,
		Qe no·l fazatz plus desiran languir ;
		Quar meiller es honrada mortz e breus,
	40	Qe lones dezirs en trebails fortz e grieus.
VI		Domna, per Dieu, non crezatz lauzengiers,
		Ni·m tenga dan ab vos lo devinars ;
		Qu'eu no sui ges d'aqels amanz leugiers
		Qi·s van gaban, a cui noz trop parlars ;
	45	Anz voil mon cor tant celar e cubrir,
		Que, s'ieu tot muer, car no·us vei ni remir,
		Pe·ls fals desfaitz pejors qe Canineus
		M'estrag de vos, e muou ves autres treus.
VII		Bona domna, per vos plaing e sospir ;
	50	E quan de vos mi coven a partir,
		Non pres un ou tot lo contat d'Angeus,
		Anz voil anar per vostr' amor romeus.
VIII		Francs reis gentils d'Aragon, gran dezir
		Hai qe·us veia gent las armas bailir ;
	55	Qar Crestians, Sarrazis ne Juzeus
		Tan rics afars no·n sap far, bons e leus.
IX		La contessa de Sobiraz sab dir
		E far plaszer, per q' hom no·s deu soffrir
		De sa lausor : tan l'ha onrada Dieus,
	60	Qe toz prez val, mais de midonz, lo sieus.