Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 392,026 Autor: Aimeric de Belenoi Gènere: Canso Número: XIX

 

Nulhs hom en re no falh

I	1	Nulhs hom en re no falh
		Tan tost, ni mesave,
		Com en luec on se te
		Per pus asseguratz ;
	5	Per que·m par grans foudatz
		Qui no tem so qu'avenir li poiria :
		Qu'ieu cujava, quan Amors no·m tenia,
		Que no·m pogues forsar oltra mon grat ;
		Mas eras m'a de·l tot apoderat.
II	10	Tant es d'amoros talh
		La belha que·m rete,
		Qu'om non l'au ni la ve
		No·n si'enamoratz.
		E donc s'ieu suy forsatz,
	15	Non cugetz ges grans meravelha sia :
		Que sa beutatz, lai on ilh se deslia,
		Vens enaissi trastot' autra beutat,
		Quom lo solelhs venz tot'autra clardat.
III		De robis ab cristalh
	20	Me par que Dieus la fe,
		E de·l sieu dous ale
		L'espiret, so sapchatz :
		Qu'ab digz enamoratz,
		Ples de doussor, ab erguelh ses folhia
	25	Parla e ri, ab tan doussa cunhdia,
		Qu'a·ls amadors creys d'amar voluntat,
		E fai amar selhs que non an amat.
IV		E quar hieu tan no valh
		Cum a·l sieu pretz cove,
	30	Am lieys, et azir me
		Quar m'en suy azautatz.
		Qu'om non es tan prezatz
		Que sa valors a·l sieu ric pretz pars sia.
		Pero, s'Amors entre·ls amans li tria
	35	Lo plus leyal ni·l mielhs enamorat,
		No·m cal temer son pretz ni sa rictat.
V		Molt suefri greu trebalh
		Quan lunhar m'en ave ;
		Mas aisso·m fai gran be :
	40	Qu'on plus m'en suy lunhatz,
		M'estay sa grans beutatz
		Tals com la vi, en mon cor, nueyt e dia,
		E·l gens parlars, e l'avinens paria
		Ab qu'ieu domney mantas vetz, a celat,
	45	Qu'om se cuyda qu'ieu aia d'als pessat.
VI		De la comtessa Beatris non poiria
		Tan de ben dir, que mais en lieis no·n sia :
		Qu'en lieis ha Dieus tan de ben ajustat,
		Com per part n'a a las autras donat.
VII	50	Senher N'Imo, s'Amors no·m retenia,
		De vos vezer mais tener no·m poiria ;
		Mas Amors m'a tan fort apoderat,
		Qu'ieu non puesc far mas quan sa volontat.