Dumitrescu, Maria. Poésies du troubadour Aimeric de Belenoi. Paris: Société des Anciens Textes Français, 1935.

Codi: 009,019 Autor: Aimeric de Belenoi Gènere: Chanson religieuse Número: XXI

 

Can mi perpens ni m'arbire

I	1	Can mi perpens ni m'arbire
		Qui son, ni de cal part veng,
		Meravil me mot e·m seing
		Con Dieus volc esser soffrire
	5	Tan lonjamenz de·ls mieus torz.
		Mas el, qu'es verais e forz,
		Pos li plaz c'a lui me vire,
		Deing asi·l peccat ausire
		Com mos mals talans es morz.
II	10	Be·s vol de tot be devire
		Qui contra Dieu pren nuil geing,
		Que Dieus non vol c'om l'enseing.
		Cuidavam passar ab rire
		Per nostres nescis deporz,
	15	Fraire ! Per pauc loncs acorz
		No nos fez trop tart assire :
		Tan tost deu hom far, con dire
		Lo ben, c'ades velha morz.
III		Que es hom, qant m'o cossire
	20	Ni que val ! A ren no·l teing.
		E doncs rics per qe si feing ?
		Es rics ? Anz n'es trop a dire,
		Aitan es freols l'esforz
		Lo jorn c'om passa los porz
	25	On van tut, ses contradire !
		Qui que·s fassa gais, ni·s mire,
		A toz es comunals morz.
IV		Lo Seingnor qui es complire
		De toz bes, prec c'ab nos reing.
	30	Ailas de·l cor ! com m'estreing,
		Cant mi menbron li consire
		Deslial, e·l fals conorz..
		Mas ar si camja ma sorz
		En ben, per que no·m n'aïre :
	35	Tals n'es ben leu escarnire,
		Qu'eu soi vius, et el es morz.
V		Pos Dieus pres per nos martire,
		Ja nos no n'aiam desdeing :
		C’ab atretal entreseing
	40	Nos a traïz lo traïre
		Saludan, don desconorz
		No m'es, c'a·l deabl' estorz
		Soi ab tan, cui fui servire :
		Non a plus poder que·m tire.
	45	Per que no·m fa paor morz.
VI		Folquetz, si ses contradire
		Crezetz so que·us auçi dire,
		No m'agra fag paor morz.
VII		Mas a sel en soi grazire,
	50	Qui, per nostra mort ausire,
		Deignet esser en croç morz.