Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Bibliografia
* Testimonis
* Aparat crític
* Notes
* Traduccions
* Imatges

 

Bec, Pierre. Les saluts d'amour du troubadour Arnaud de Mareuil. Toulouse: Édouard Privat, 1961.

Codi: 030,V Autor: Arnaut de Maruelh Gènere: Salut d'amor Número: V

 

Totas bonas donas valens

 
1
Totas bonas donas valens
   
Cuy joy, deport, ... e joven[s],
   
Ensenhamen e cortezia,
   
Jent aculhir, bela paria,
 
5
Cortes respos e bel solatz,
   
Cuy bel ris agrada e platz,
   
Creis[sa] Dieu lo pretz e l'onor,
   
Bona Dona, per vostr' amor,
   
En cuy joy e jovens s'atura
 
10
May c'ab nulh’ autra creatura ;
   
E sels que de joy so amicx
   
Sal e bayss e mov[a] destricx (1)
    los enuios e·ls engres (2).
   
Mas vos qe m'etz al cor pus pres (3),
 
15
Salv e gart sobre totas res
   
E·us don cor qe·us prenda merces.
   
Dona, d'aisso q'ieu vos dirai (4)
   
No·m sia dans si pro no·y ai.
   
Uzatjes es e dreitz, so·m par,
 
20
Q'en bona cort deu ben parlar
   
Messatje tot asseguratz
   
De tout aco qe es mandatz.
   
Mas pero, si tout s'es uzatje,
   
E no me·n forses sens coratje (5),
 
25
Ni·n pogues escapar estiers,
   
No volgra esser messatgiers
   
D'aisso qe eras vos dirai.
   
E doncx, bona Dona, sie·us play,
   
Pus per forsa soi sai trames,
 
30
Aiso qe vos dirai no·us pes,
   
Qe Amors c'a la senhoria
   
De tot cant qe el segle sia
   
Me guida segurs . . . . . . . . . . . .
 
35
Qe no·m siatz de breu....
   
Car sabetz qe nostra (6) . . . . .
   
Ni o feratz ni o faretz (7)
   
A totz los jorns qe [vos] vieuretz.
   
Denan vos me tramet aisi
 
40
Mon cor, qe sap lial e fi,
   
De bon engenh, ad ops d'amar,
    Per servir e per tener car,
   
E per selar e per sofrir,
   
Per honor e per aculhir,
 
45
Per tot cant aman deu aver,
   
Qe res no·y falh de son poder,
   
E qi de son poder es bos,
   
No·l deu pus demandar razos.
   
E ditz qe vos es sela res
 
50
Cuy cove may honors e bes
   
E obezirs e car teners,
   
Servirs et honors e temers,
   
C'a nulh' autra, ses contenso ;
   
Per so vol e manda qe·[m] do
 
55
Aisi a vos per bona fe,
   
Qe res no·y aja part en me
   
Mas vos sola, foras de Dieu ;
   
E si Dieu deges tener fieu,
   
De vos tengra la sua part.
 
60
Per so qe non agues regart
   
Q'ie·us fos de mi forsatz pariers,
   
Mas qe fos fis e drechuriers,
   
Qe ja non er contrarios
   
Qe no fassa totas sazos
 
65
Com del tot al vostre voler ;
   
Aisi·m comanda remaner
   
Amors ab vos, e m'o ensenha ;
   
Car el a poder qe destrenha
   
Trastot cant es, e pot o far ;
 
70
Per q'ieu no vuelh fols contrastar
   
Ni o faria qe pogues,
   
Mas d'aitan q'ieu no·us o disses ;
   
E·l bon coratje q'ieu vos ay,
   
Si m'ajut Dieus, ver vos dirai
 
75
Me platz, Dona, qe nulha res
   
No·m plac mays tan qe m'avengues ;
   
E grazisc o de mon poder,
   
Car m'a donat tan ric voler
   
Amors, ab sol qe no·m forses
 
80
Qe per paraulas o mostres ;
   
C'Amors me ditz qe vostre sia
   
E no me·n parta nueg ni dia ;
   
Qe no·us o disser' a nulh for,
   
Ans selera tos temps mon cor,
 
85
E fora vostre coma suy.
   
Mas Amors, Dona, no·us enuy,
   
Vas cuy non pot valer esfortz
   
Qe non destrenha los pus fortz.
   
Non cossen pas Amors selar,
 
90
Enans lo·m fay a vos mostrar,
   
Car tresaur se pert a senhor (8)
   
Si tot s'es dan sia onor
   
Tro·l senhor sap lo loc on es.
   
Atressi, bela franca res,
 
95
Fora lo mieu fis cors perdutz,
   
Si per vos no fos conogutz.
   
Mas ara vos ai demostrat
   
Aisi com Amors m'a mandat ;
   
E pus [per] mon cor [vos] sabetz,
 
100
Per la valor e per lo pretz,
   
Qe yeu, Dona, vos clam merce,
   
Qe·l fin cor e la bona fe
   
Q'ie·us ai non getes a non cura.
   
Franca res, fina car' e pura,
 
105
Res no·us qieir de tot can avetz
    Mas so qe tolre no·m podetz :
   
Tolre no·m podetz qe no·us am,
   
Neys s'ieu e vos o voliam,
   
Qe no m'o cossentri' Arnors
 
110
Ni no m'o tolria paors ;
   
Q'ieu no·us qier autre guizardo
   
Mas solamens qe·us sia bo
   
Q'ie·us am e sitot bo no·us es,
   
Sivals faitz semblan qe no·us pes.
 
115
Si per m'amor non o sufretz,
   
Sufretz o endreg vostre pretz ;
   
Car mot l'es ops sapcha sofrir
   
Qi vol a gran honor venir ;
   
Si m'avetz mal cor, no me lais ;
 
120
Greu m'es, Dona, mas non puesc mais,
   
Qe no me·n sai venjar estiers,
   
Mai d'aitan vos serai gueriers
   
A vos aurai amor coral
   
E a mi meteys volrai mal,
 
125
E laissarai chant e deport
   
E murrai trist ab desconort
   
Si vey qe vos plassa mos dans
   
E no·us sia bos mos enans.
   
Aqesta venjansa·n penrai,
 
130
Qe jes autra penre non sai.
   
Mi eys puesc yeu ben azirar,
   
Mas ja vos non puesc dezamar,
   
Ja per res del mon qe·m fassatz.
   
Tan m'es plazen vostre solatz
 
135
Non er jorn a tota ma vida,
   
Dona cortez' e issernida,
   
Qe per uzatje no sopley,
   
On lo vostre gen cors estey ;
    C'Amors m'a ins el cor enclaus
 
140
Vostra valor e·l vostre laus,
   
L'ensenhamen e la beutat,
   
La franqeza, l'umilitat,
   
La cortezia e·l gen parlar,
   
Lo jen solatz e·l domneyar,
 
145
La vostra bela captenensa,
   
Lo saber e la conoissensa,
   
Los dos semblan gay amoros,
   
Lo plazen avinen respos,
   
Lo vostre jen cors cuend' e gay,
 
150
Ab tant co·s cove ni s'eschay
   
De tot sen e de tot saber
   
Qe bona dona deu aver
   
Tug aqest avinen plazer,
   
Qe negu no se·n pot mover,
 
155
Guardon a la vostra honor
   
Mon cor per mandamen d'amor,
   
E·l tenon si assolassat,
   
Ab aitan fina voluntat,
   
Qe no·y intra autre voler
 
160
Ni auzaria remaner.
   
E pus de vos no·m puesc partir,
   
Si autre be no·m deu venir,
   
Per Dieu e per merce vos clam
   
Qe no·us sia greu car vos am,
 
165
Qe no me·n puesc partir ni aus,
   
C'Amors a pres de mi las claus ;
   
Aisi al vostre salvamen
   
Tot' autr' amistat mi defen ;
   
Cal qe·m fassatz, o mal o be,
 
170
Vos am e·us amarai jasse.
   
E fin' amor per sa merce
   
Meta·us en cor qe ametz me ;
   
Digas tug amen per amor,
   
Las donas e li aimador,
 
175
Dona.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI