Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Codi: 401,006=268,001 Autor: Raimon Gaucelm de Bezers, Joan Miralhas Gènere: Tenso Número: XVII

 

Joan Miralhas, si Dieu vos gart de dòl

I	1	Joan Miralhas, si Dieu vos gart de dòl,
		Qual vos plai mai d'aquela partizon
		Que sïatz totz redons del cap tro'l sòl
		O totz fendutz del pè tro al menton,
	5	E que portetz sobre'l nas la culveta ?
		Dïatz me'n ver adès ses falhizon,
		Sinon eu vos dirai qu'ai tal falveta
		Que non devètz far cobla ni tençon.
II		Ramon Gaucelm, ja negus ab mon vòl
	10	Non vuelh semblar ni [d'aiçò] n'ai razon ;
		Mas [l'un] penrai, per la fèsta qu'òm còl !
		Mais am èsser tròp fendutz que non pro ;
		Qu'al mens aurai budèl que passès meta
		Sitot m'estai lo braguier sul guinhon,
	15	Et a vos lais que sembletz faisseneta,
		E cavalguetz en travèrs, sie'us sap bon.
III		Joan, pueis poiretz al son del flaütòl
		Balar, mas pietz avètz pres, per razon,
		Que non fai cel que's califa al cruòl,
	20	E laissa'l fòc bèl clar al fogairon ;
		Car s'aital es, mais vielha ni toseta
		Non cre vos vuelha ; e pus aital faiçon
		Volètz aver, Dieu prèc que la'us trameta,
		E garde'n mi que desirós no'n son.
IV	25	Pus tant vos platz la faiçon del mojòl,
		Ramon Gaucelm, ve'us un depòrt tròp bon,
		Vos rodolatz et ieu irai pel sòl
		Et a l'ussòl farai ne bodoisson ;
		E si tant es que Na Còrs-Car trameta
	30	Que non anetz ad ela de randon,
		No'i vei conselh mas qu'en una carreta
		Vo'n traversetz, e no'u cal esperon.
V		Joan, tròp pus pèc me semblatz qu'un nuchòl ;
		Per qu'ieu non prètz vòstre dich un boton :
	35	Car si Midons me demanda ni'm vòl,
		Far m'ai, si son redons tro al talon,
		Portar a leis en cubèrta carreta.
		Vos seretz tal qu'en caval cim l'arçon
		Non i par res ; e si'l vòstre cul peta,
	40	De la boca ètz [près] per beure pron.
VI		Azempratz ètz que portetz un filhòl
		A la glèisa, Ramon, dïatz me con
		Lai anaretz si doncs en carriòl
		No'us faitz tirar a tal carrïaton ;
	45	Mai ieu venrai de bèl' ambladureta
		En palafren, e si tròp fendut son
		El mieu mieg lòc metrai una barreta
		E breujarai mos estreups de faiçon.
VII		Joan, òps aurà sia fòrtz la barreta,
	50	Que si trenca, tal daretz del menton
		Que creisserà'n vòstra fendedureta,
		E vos fendretz tòst per pauc d'ochaison.
VIII		Ramon, si vos cazètz de la carreta,
		Ops i auràn tuch vòstre companhon
	55	Anz que'us levetz, e la vòstra panceta
		Esclatarà si avètz manjat pron.