Bec, Pierre. Burlesque et obscénité chez les troubadours. Pour une approche du contre-texte médiéval. Paris: Stock, 1984.

Codi: 210,022 Autor: Guillem de Berguedan Gènere: Sirventes Número: XXVII

 

Un trichaire

I	1	Un trichaire
		Pèstre laire
		Vòl que chant, pus sui chantaire.
		Cossiraire
	5	Mal pessaire
		Serai del chant tro l'esclaire.
		De Sensaire
		Tro Belcaire
		A cercat lo galïaire,
	10	Trichant cum fòl prezicaire :
		Facha s'a'l corona raire.
II		Rogier fraire,
		Colom vaire,
		Per vos vuelh un sonet braire.
	15	No près gaire
		Mon vejaire
		Si vertat no'us puesc retraire.
		Anc bilhaire
		Vòstre paire
	20	Non issic tal coart d'aire.
		Per tot dizon qu'ètz bauzaire
		Contra'l servizi Dieu faire.
III		La mesquina
		Flaira e grina,
	25	Que maistre Rogier enclina,
		Tan festina
		E s'aisina
		Tro sent la douçor conina ;
		De s'orina
	30	Fai mezina,
		E'l con non cessa ni fina,
		Qu'en la ciutat peitavina
		Se rompèt fotent l'esquina.
IV		Disciplina
	35	Fai en tina,
		Quan la pòt tener sobina
		Ab sa pina
		Qu'el traïna
		Josta la coa seguina,
	40	Sa cosina
		Vòl vezina
		Mais que'l mar Santa Crestina,
		Qu'ab son grat ser ni matina
		Sos viechs non es ses gaïna.
V	45	Res aurana
		Dieus engana
		Cum desfaça'l lei romana,
		Crestïana
		Fot sotz vana
	50	Quaranta vetz la setmana.
		Que vilana
		Tenc Guiana
		Si la colha non l'aplana.
		Quan ditz sa leçon trefana
	55	Sembla mula quan regana.
VI		A Serana
		Par Vïana
		Fon pres ab una putana.
		D'aital mana
	60	Cerquèt Trana,
		Sur e Bar e Corrozana.
		Pueis de Grana
		La mejana
		Tornèt en Valh Sotirana,
	65	Fotent per terra d'Ossana,
		Qu'anc non la vi mas aurana.
VII		Çai venc savis
		Colhons blavis
		Per saber quals es peitavis.
	70	Anc clergavis
		Ni gramavis,
		Sarrazins ni Amoravis,
		Non donavis
		Tals culavis
	75	Dessobre fòrt de cons cavis.
		Rogier, grieu auretz bons avis
		Si la colha no'us tòl clavis.