Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Codi: 236,006 Autor: Guilhem de la Tor Gènere: Canso Número: III

 

Quant hom reingna vas cellui falsament

I	1	Quant hom reingna vas cellui falsament
		qui l'onra e·l serf e l'ama finament
		ses traïment,
		per piegs o deu tener
	5	de lui que d'autre, qui vol dir lo ver.
		Per que? Car cel en cui hom plus se fia
		ses fadia
		pot mielz l'om enganar
		que cel de cui hom sap que·s deu gardar.
II	10	Per qu'eu o teing plus a mal aissament
		a la falsa non feir' az autras cent
		del failliment
		que·m fez, c'ab ferm voler
		la servia e de tot mon poder;
	15	pero nulz hom tant servir non poiria,
		s'el servia
		malvatz seingnor avar,
		que ia·n pogues hom guazardon cobrar.
III		Per qu'eu m'en part ses tot atendement
	20	de s'amistat, que no n'ai plus talent;
		e si m'entent
		en tal, qu'al mieu parer,
		de sa ricor non pot nuillz hom saber
		meillur de llei ni ab plus cortesia,
	25	ni qui sia
		plus d'avinent afar,
		ni mielz sapcha rire ni gent parlar.
IV		Ni ges non cre, segont que m'es parvent,
		qu'om sapcha el mont plus bella ren vivent
	30	ni que plus gent
		sapcha pretz mantener.
		E si m'a diz qu'eu aia bon esper
		el sieu ric ioi e qe l'am ses bausia
		tota via:
	35	car, si ben o sai far,
		bon chausiment poirai ab lei trobar.
V		E pois li platz qu'eu aia entendement
		el sieu bel cors amoros e plazent,
		tant fermament
	40	m'a tot al sieu plazer
		q'autra del mon no·m pot mais retener:
		qu'amors m'a mes, qui·m ten per lei e·m lia,
		en tal via
		c'un iorn mi fai pensar
	45	et un autre mi fai rir'e chantar.