Blasi, Ferruccio. Le poesie di Guilhem de la Tor. Genève - Firenze: Leo S. Olschki S. A. - Leo S. Olschki, 1934.

Codi: 236,003a Autor: Guilhem de la Tor Gènere: Descort Número: IX

 

En vos [eu] ai mesa

I	1	En vos [eu] ai mesa,
		pros domna cortesa,
		m'amor ses defes,
		car senz e proeza,
	5	[pretz e leialeza]
		e trastotz los bes
		aves vos conqes
		qe no n'es meinz res.
		Mas pauc, ai, adeza
	10	en vos, de qe·m pesa,
		contra mi merces;
		mas per la franqesa
		e per la proesa,
		domna, q'en vos es,
	15	[vos] prec qe·m valgues
		vostre cors cortes
		amoros
		e ioios
		e plazens,
	20	bels e bos,
		gais [e] pros
		[e] valens.
II		Car, per vostr' amanza,
		sui en gran balanza,
	25	si no m'aiudatz,
		qa[r] ab una lanza
		d'amor ses doptanza
		sui tant fort nafratz
		q'eu non trob eganza
	30	de ma malananza.
		Mas lo mal[s] mi platz,
		s'ieu aten
		ioi valen
		ab temenza
	35	ses faillenza
		de vos, ien
		e plazen;
		car vos genza
		conoissenza,
	40	et enten
		veramen
		qe vos venza
		ab suffrenza.
III		Car, [en] suffren,
	45	venz hom la gen,
		per qu'eu ses cor galiador
		[e] leialmen
		ses faillimen
		vos am [e] ses cor trichador.
IV	50	Car mais dezire
		de vos martire
		qe no faz d'autra iauzimen,
		car de pretz maire
		es e de l'aire
	55	de las bellas genz ses conten
		e, qar no·m vire,
		domna, ni dire
		no·us aus [lo mieu] entendimen,
		be·m degratz faire
	60	menor maltraire
		e q'eu del vostre bel cors gen
		ses escondire
		enqier iauzire
		fos, car vos am tan finamen:
	65	car, fiz amaire
		e merceiaire,
		vos am de bon cor, humilmen.
V		Et am mais l'esper
		de vos e·l voler,
	70	bella douz' amia,
		qe d'[un']autr'aver
		baizar ni iazer.
		Doncs, gran cortezia
		faretz, donn', en ver,
	75	si·m degnatz valer,
		anz qe·l mals m'aucia.
VI		Ma domna Salvatia,
		ies del cor volatia
		non es; anz faz dir
	80	gran ben sens mentir
		de vos, e·us agenza
		trastota valenza.
VII		E na Biatritz,
		cui ioi[o]s pretz es guitz,
	85	voil, si·l platz, q'entenda
		mon novel « descort »,
		car senes esmenda
		son valen pretz port.