Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Codi: 234,017 Autor: Guilhem de Saint Leidier Gènere: Canso Número: XV

 

S'eu tot me soi un petit malananz

I	1	S'eu tot me soi un petit malananz,
		Ges per aitant non pejura mos chanz,
		Anz voil meillur a totz jornz [e s']enanz,
		Qe m'amia s'enanza de tot be.
	5	E dizon tuit qe drutz a no sai qanz,
		Per q'ai tal gaug qe d'ira no·m sove,
		E jur vos Dieu, s'il n'avi' autretanz,
		Non cuidera qe ames mas sol me.
II		Enanz li prec c'am los petitz e·ls granz
	10	C'ades perd en lo[s] jornz e·ls mes e·ls anz;
		Si m'am' il ren, eu leis am mil aitanz
		Q'enapres sai c'aura de me merce.
		Am [j]a totz cels cui en penra talanz,
		Que·l temps s'en vai e non enanzam re,
	15	E can sera veilla testa-crotlanz,
		Vos trobaretz qe non ames mas me.
III		Eu no soi ges d'aqels nescis amanz
		Qe juron Dieu non amon [ab] aitanz
		»Qi pot sufrir los venenz e·ls ananz!»
	20	Zo di aqel c'a son drut non cove.
		Que n'ai sofertz maintas vetz perd' e danz
		Mas no·n soi sols, q'a maint o s'esdeve;
		Anz volria c'ames sincenz Braimanz,
		Sol q'enapres saubes que ames me.
IV	25	Bell' amia, coind[a] e benistanz,
		Si trobavas d'aqels arlotz truanz!
		Il porton pro esterlinz e besanz —
		E per aver fai hom de mainta re!
		No·us sia greu s'en consir mainz afanz,
	30	Qe·l paupres vol molt [be] d'aizo qe ve.
		. . . . . . . . . . . . . . . . . . . . . . .
		. . . . . . . . . . . . . . . . . . . . . . .
V		Zai en pascor, seretz coind' e prezanz
		E trobares los Engles e·ls Normanz,
	35	E vostr' ostals es amples e vojanz:
		Metetz la·n tanz entro qe l'aiatz ple.
		E ja pois plus qe roncis d'Alamanz
		Vostre cavals non estei senz lo fre!
		E qant aures plena la borz' e·ls ganz,
	40	Pois poires far vostres »rigueultz» de me.