Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Codi: 234,001 Autor: Guilhem de Saint Leidier Gènere: Canso Número: I

 

Ab mil volers doblatz de fin'Amor

I	1	Ab mil volers     doblatz de fin' Amor
		A la gensor     et ab mais de plazers
		Qu'ieu sai el mon m'autrey e·m suy donatz,
		Quar tan mi platz      sos belhs cors covinens
	5	E sos ricx pretz grazitz per totas gens
		Qu'on plus cossir l'ardimen e l'erguelh
		Qu'ieu fas quar l'am, adoncx pus la dezir,
		Aissi cum selh que vay, sabens, murir
		Lai on pus ve combatre ni defendre.
II	10	Quar tant esders     son pretz en gran ricor
		Que ma valor     mi sobrevens temers
		Per trop-amar e quar sai qu'es vertatz
		Que·ls pus prezatz     fai totz doptos mos sens.
		. . . . . . . . . . . . . . . .
	15	Amors me bat tan fort que totz m'en duelh;
		Doncx segrai la, mas no sai on me vir
		Del combatut que mays no·s pot guandir
		Et a merce al pus pros si vai rendre.
III		E·l sieus vezers     m'a tan doussa sabor
	20	Que ges alhor     non es mos bos espers,
		E si del tot suy vas lieys encolpatz
		Es quar forsatz     l'am et es tan valens
		E cum amicx vuelh far sos mandamens
		E quar li plai ni an chauzit mey huelh
	25	Ni quar de lieys son tug mey bon cossir
		E quar li platz qu'ieu, ses pus, la dezir
		Que, s'era reys, tart mi pogra rependre.
IV		E quar es vers     que la fresca color
		Laus e·l doussor     que fai lo sieus vezers
	30	E sos belhs ayps e sas plazens beutatz,
		Quar pus lauzatz      fora·l cors avinens,
		Gras, blancx, delguatz, caps de totz jauzimens,
		Qu'ieu ja·l vis nut cum vi[u] dins son capduelh,
		Quar mielhs pot hom lauzar senes mentir
	35	Aquo que ve que quan fai per albir,
		Et ieu vuelh gen vers laus en lieys despendre.
V		Quar jorns e sers     sopley e·l port honor
		Ab gran temor,      tant es paucx mos sabers
		E si·nfra lieys. Mais non sera trobatz
	40	Belhs dos honratz?      Si! Lai on Chauzimens
		Es ab belhs digz e fagz complidamens,
		Ni don poiray aver aigua, si·n vuelh,
		Si·n mar no·n truep e lai la vau querir.
		Doncx, si Merces de lieys no·m fai jauzir
	45	Ja mais alhors no·m fara jorn atendre.