Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 281,008 Autor: Lamberti di Buvalel Gènere: Canso Número: VIII

 

S'a Mon Restaur pogues plazer

I	1	S'a Mon Restaur pogues plazer
		Tant qu'il me volgues restaurar
		Los dans q'ieu ai pres per amar,
		Mais en feira son pretz valer,
	5	C’autre bes, so me par, no·i faill
		Mas merces; e s'en tal miraill
		Mi pogues mirar, grand honor,
		M'agra dieus faich de la gensor,
		Don ai estat tant volontos
	10	De liei servir totas sazos.
II		Pois Mon Restaur non puosc vezer
		Lo douz ris ni·l plazen esgar,
		De mos huoills non sai mais que far,
		C’aillors no·m poirion valer;
	15	Qand ieu no·l vei, soven badaill,
		E qand ieu cuich dormir, trassaill,
		E prenc los draps e·l cobertor
		E qand m'esveill, sospir e plor,
		Puois chant per leis e sui ioios
	20	Qan mi soven del gen respos.
III		Mos Restaurs a pretz e saber
		E cortesia e gen parlar,
		Tant q'a chascun si fai prezar,
		Per que sos pretz deu mais valer,
	25	E s'ieu n'agues ioia o fermaill,
		Plus fora rics d'un amiraill,
		C’ades vei doblar sa valor
		En fin pretz et en gran lauzor,
		Per q'ieu n'estau plus cossiros
	30	Qand non vei sas bellas faissos.
IV		Mos gens Restaurs a en poder
		Totz los bos aips c'om pot penssar
		E sap lai, o·is taing, mieills honrar
		E plus cortesamen valer,
	35	Per que vas lieis no m'anuaill
		De servir, e s'ieu n'ai trebaill,
		Fatz a lei de bon sufridor,
		Que l’afans mi sembla doussor;
		Per que fora dreitz e razos
	40	Qe·m n'avengues qualqu'onratz dos.
V		De Mon Restaur no·m desesper,
		Anz voill en sa merce estar
		E servir e merce clamar,
		Que bos servirs mi deu valer.
	45	Si fai tant que per lieis mais vaill
		E·n sui de plus avinen taill,
		Ves midonz et enves amor,
		Pel fin pretz e per la ricor
		Qu'es en lieis rics e cabalos,
	50	E creis ades totas sazos.
VI		Chanssoneta, vai tost e cor
		E diras m'a l'una seror,
		En cui es fis pretz cabalos,
		Que trop atendres non es bos.