Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 282,025 Autor: Lanfranc Cigala Gènere: Canso Número: XXXVI

 

Un avinen ris vi l’autrier

I	1	Un avinen ris vi l’autrier
		Issir d'una bocha rizen;
		E car anc ris tant plazentier
		Non vi, n'ai al cor ioi plazen.
	5	Pero fols sui de l'alegrier
		Qi·m ten tant alegr'e iauzen,
		Que quant sui en cossirier
		E cossiran trai tal tormen
		Don cug languir de desirier,
	10	Q'autre ioi non desir ni qier
		Et aqel cug q'aurai trop len.
II		Miels pogr'om garir d'un archier
		Qe sagites tan duramen
		Qe traspasses l'ausberc doblier,
	15	Qe del sieu dobl'esgard pognen,
		C’ab l’un oil primeiramen fier
		Et ab l’autre [se·n] vai feren;
		Pois fai un gai rizet derrier,
		Ab qe me fier derreiramen;
	20	Et intra se·n per l'oil primier,
		Mas pero car l’oils no·l soffier,
		Vai al cor afortidamen.
III		Quan fon e mon fin cor intratz
		Dedinz lo bels ris e l'esgart,
	25	Mos cors s'en venc tost e vivatz
		Vas me claman: «merce, qu'eu art!
		Ades siatz enamoratz
		De l’amoros cors, cui Dieus gart,
		Q'a me, qi sui vostre cor, platz!»
	30	Tan vei plazen son cors gaillart,
		En cui es complida beutatz,
		C’abellis a totz los prezatz;
		Dels crois si loigna e·s depart.
IV		S'ieu trobes qui li fos privatz,
	35	Qui privadamen da ma part
		Portes salutz e amistatz
		A lieis, don ma salutz no·s part,
		Tan li en trametrai, sapiatz,
		Que s'ela·m tramezes lo qart,
	40	Eu m'i baingner'ab gran solatz.
		E·m baing de solatz ses regart;
		E pos tant me sui azautatz,
		S'azautz iois me·n es destinatz.
		Per merce la prec no·l m'atart.
V	45	A mos iorns non cugiei vezer
		Que ris, qe par naisser ab iai,
		Agues tan afortit poder
		Qu'el pogues engenrar esmai,
		Anz en degran naisser plazer
	50	Plazen del bel ris qu'eu vi lai;
		Pero mon cor me·n fai doler
		Doloiros pessamenz qu'eu n'ai:
		Mas no son tant li desplazer
		Desplazen que·m cailla temer
	55	Qu'eu en mora, enanz en viurai.
VI		Pero si·m cug eu tant valer,
		Si valors nul hom'enanz trai,
		Qu'ieu n'aurai complit mon voler,
		Si sa voluntatz no·l m'estrai.
	60	E si·m volgues dreg mantener,
		Pos sa mantenensa mi plai,
		De midonz mi degr'eschazer
		Tot so q'a fin aman eschai.
		Pero eu no·il qier son aver,
	65	Mas la re qe·il sabrai qerer,
		Si m'o dona, ben o penrai.