Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 290,001a Autor: Luquet Gatelus Gènere: Sirventes Número: LXV

 

D'un sirventes m'es granz volontatz preza

I	1	D'un sirventes m'es granz volontatz preza
		Q'ieu trameta al pro rei dels Poiles,
		E si tot s'es en sobreira richeza,
		S'eu lo conseil, no·il desplaza ni·l pes;
	5	Qe de fol apren hom tot dia
		Sen; e qi ben enten, ben tria:
		Per q'ieu li prec q'entenda mo saber,
		Pois l’apregna o·l met'a non chaler.
II		Can reis desten son cor en gran empreza,
	10	Contendre'm pauc non l'es honors ni bes;
		Qe·l pauc[s] contrast[z] adutz pro vetz defeza
		Mais qe l'assais e pois val pauc conqes;
		E si·l reis vol la vicaria
		De l’emperi ni la baillia,
	15	No l'entenda senz esfortz conqerer;
		Ni cor a tal q'a tant agra·l poder.
III		Non dic ieu ges pos aura Poilla preza
		Qom qe sia, qe la demeta ges;
		Qe·l demetres li seria flacheza,
	20	Don l'enemic creisseran per un tres,
		E·l cors dels amics mermaria;
		Mas ieu dic q'al primer deuria
		Totz reis triar so q'empren e vezer
		C'aizo q'enpren l'aven pois mantener.
IV	25	Donc derenan mostr'al mon auteza
		D'autra guiza, s'aver la vol manes,
		E non ublit perdon per null'ofeza,
		Pos merceian en son poder er qes;
		E qi qe·il volla segnioria
	30	Portar en obr'e en paria,
		Prenda la votz, e non cobeit l'aver
		Lo sobreplus, q'en breu faillon lezer.
V		E gart se ben en cui se fi ni creza,
		Car en alzo granz partz dels seus faitz es,
	35	E non se fi en chascuna promeza,
		Ni tot son vol non dig'en totas res:
		Mas en son cor port tota via
		La balanza e qe qe sia
		Pez e balanz los digz e·ls faitz en ver,
	40	E·l miels prendre non perda per voler.
VI		Tant a·l reis cor qe no·il plairia
		Hom senz cor en sa compagnia,
		Segne'n Sordel, per q'eu non l'aus vezer,
		Qe mon cor a tals don no·l pois mover.