Chambers, Frank M.. Two troubadours lyrics. "Romance Philology", 30 (1976-1977), pp. 134-144.

Codi: 414,001=261a,001 Autor: Rainaut de Pon, Jaufre de Pon Gènere: Tenso Número: I

 

Seigner Jaufre, respondetz mi si·us platz

I	1	Seigner Jaufre, respondetz mi si·us platz,
		Cals amors val mais al vostre vejaire:
		De dos amics l’uns es tan aut pujatz
		C’ama domna valen de ric affaire,
	5	Tal c’a penas cuida s’amor aver,
		Mas honors ll’es sol car lo fai doler,
		E l’ama tant que no s’en pot estraire;
		E l’autres a de sidonz son voler,
		Si que de ren no·ill defen son plazer,
	10	Mas el non a en l’amor honor gaire.
II		Seigner Rainautz, totz m’en sui conseillatz.
		Aital domna non voill vas mi atraire
		Que de mon mal agues joi e solatz
		E de s’amor no·m tengues com a fraire,
	15	Que maint joi son perdut per lonc esper.
		Aitals ricors don hom non a poder
		Fera·m tos temps em perdon greu maltraire;
		Mais voil celleis ben amar e temer
		Que·l guazardon non met a noncaler,
	20	E qui·s voilla sia d’autra musaire.
III		Seigner Jaufre, non son ges musador
		Tuit cil qu’aman domnas de gran valensa;
		Qar qui plus vol aize que gran honor
		Non a en se veraja conoissensa,
	25	Que ben deu hom per so gran mal sofrir
		Don pot grans bens e grans honors venir.
		E per ren als fin’amors no m’agensa,
		Mas per leis voill honor enavantir.
		E quar voletz tal rason mantenir
	30	Que ren non val, fazes i gran faillensa.
IV		Seigner Rainautz, aquil sab mais d’amor,
		Si voliatz aver bon’entendenssa,
		C’a son amic fa so que·ill es meillor
		Que non fai cil que son joi li bistensa;
	35	Qu’eu non voill ges tos temps aital servir
		Que non agues mais l’anar e·l venir.
		E vos n’ajatz aquella contenenssa,
		Q’en amatz mais l’atendre que·l jauzir;
		Per so s’en fan li Breton escarnir,
	40	Que fan d’Artus aqel eiss’atendenssa.
V		Seigner Jaufres, Artus non atend eu,
		C’a tal ai dat e mon cor e ma via
		Que sembla ben que il azires greu
		Neguna res qe ages em baillia.
	45	E si mi fai mal ni pena durar,
		No m’en dei ges per so desesperar,
		C’aprop lo mal n’autrai ben tota via,
		S’ieu n’ai l’onor sivals al comensar
		Per so dei eu lo gran joi esperar;
	50	Que Dieu me·l don aissi com eu volria.
VI		Seigner Rainautz, per la fe que dei Deu,
		Dit m’o avez aissi con eu querria,
		Que·l jauzimen d’amor sion tut mieu
		E li maltrag a la vostra partia;
	55	E car vedetz que non podetz als far,
		Sabetz vos en avinen conortar;
		E qant o vei non puosc mudar non ria.
		Huoimais laissem nostra tenson estar,
		Que ben sab hom cals es meiller d’amar,
	60	Aquel que pren o aqel que fadia.
VII		Amics Jaufres, mal sabetz rasonar,
		E sembla·m be que pauc sabetz d’amar,
		Que faz d’onor e d’amor miei partia.
VIII		Seigner Rainautz, ja no·us o quier triar,
	65	Mais c’a vos platz que vos laissatz trufar,
		Si·us entendetz plus en folleteria.