Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Codi: 461,189 Autor: Anonyme Gènere: Canso Número: VI

 

Per fin'amor ses enian

I		Per fin'amor ses enian
		cant, car eu en loc valen
		ai mes mon entendimen
		..........................[-an]
	5	e vos, bella douz'amia,
		vas cui soplei noit e dia,
		car vos m'avetz genz conqes
		a bels dic e ab faig cortes.
II		Per qe·us voil e·us dezir tan
	10	qe en ren als non enten,
		car vos mi tenez iauzen
		en dormen et en veillan;
		per o vos am ses bauzia
		qe ieu dir no·us o sabria,
	15	e, s'aizo vertat non es,
		ia d'amor no·m venga bes.
III		Dompna, eu ai dezir tan gran
		de vos vezer plus soven,
		qe d'un breu iorn m'es parven
	20	q'eu n'aia estat un an,
		tan es d'avinen paria;
		e s'eu vos soven vezia,
		las autras vis qi·s volgues,
		sol q'eu vos vezer pogues.
IV	25	E ges per mal ni per dan
		d'autras ni per aunimen
		non o dic, mas tan m'es gen
		qant vos posc esser denan,
		qe tot lo mon, s'eu l'avia
	30	e mon poder, i daria,
		per tal q'eu l'açar agues
		q'ades vos vis, tan bel m'es.
V		Vostre bel cors benestan
		sal Dieus con lo plus plaisen
	35	q'eu sai e·l plus avinen,
		e·l plus gai e·l mielz parlan,
		et ab mais de cortesia
		qe nul'autra q'el mon sia;
		e s'eu per nom vos dises,
	40	tuit conogron que vos es.
VI		Lo cor qe·us ai ses bauzia
		veiatz, bella douss'amia,
		si·us platz, e non gardatz ies
		........................................ [-es].