Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Testimonis
* Aparat crític
* Traduccions
* Imatges

 

Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Codi: 370,003 Autor: Perdigon Gènere: Canso Número: II

 

Ben aio·l mal e·l afan e·l consir

I 1
Ben aio·l mal e·l afan e·l consir
   
qu'ieu ai sufert lonjamen per amor ;
   
que mil aitan m'en an mais de sabor         
   
li ben qu'Amors mi fai aras sentir,
  5 que plus mi fai lo mals lo ben plazer ;
   
que semblan m'es que si ja mals no fos
   
ja negus bens no fora saboros ;
    donc es lo mals melhuramens del be,
   
per qu'usquecs fai a grazir quan s'ave.
     
II 10
A fin'Amor grazisc lo douz dezir
    que·m fai estar en tant fina doussor,
    que non es mals don en sentis dolor,
    si totz lo mons me jutjava a morir ;
    et aia·n grans merces, car fetz voler
  15 a la bella de cui fatz mas chansos
    qu'a lieys mi des, car anc tant no·m plac dos ;
   
quar qui·m dones tot lo mon per jasse,
    no·m plagra tant cum quan li donei me.
     
III  
Qu'en amador pogr'il ben avenir,
  20 tan a de pretz, de sen e de valor,
   
don se donera trop mais de ricor ;
    mais als auctors ai ancse auzit dir
    qu'en ben amar em chascus d'un poder,
    et hom paubres fai hi melhurazos,
  25 quant es de sen, contral ric cabalos,
   
qu'aitan quan sap meins de valor en se
    tant grazis mais qui·l honra ni·l mante.
     
IV  
Quar fin'Amors no manda ges chauzir       
    comte ni rey, duc ni emperador,
  30 mas fin amic e ses cor trichador
    franc e leial e que·s gart de falhir ;
    e qui no sap aquestz ayps mantenir
    paratge aunis e si mezeis met jos,
    car ad amor non es valens ni bos ;
  35 qu'en paratge non conosc eu mais re
   
mas que mais n'a cel que mielhs se capte.
     
v  
Fis jois honratz, pois tant vos faitz grazir,
    per amor Deu aissi doblatz l'onor
    que·m retenguatz per leyal preyador,
  40 e no vulhatz escoutar ni auzir
    fals lausengiers, quar en joi dechazer
    ponhon totz temps, tant son contrarios,
    e vos faitz lor morir totz enveios ;
    si co·l pechat estenh hom ab merce,
  45 estenhetz els, quar per els no·m recre.
     
VI  
Aitan sapchatz, s'ieu ja ren cug valer,
    mos senher n'Uc del Bautz, qu'es envejos
    de tot quan tanh a fin pretz cabalos,
    m'o fai cujar, qu'ab tal gaug mi rete
  50 cum s'er'ieu pretz qu'el ama mais que re.
     
VI  
De Monpeslier vai ben a mon Plazer,     
    qu'el seigner es francs e humils e bos
    et en sos faitz es d'aitals guizerdos
    qu'el honra Dieu et tot bon pretz mante
  55 per qu'el lo creis e l'enanssa e·l soste.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI