Aston, S. C.. Peirol. Troubadour of Auvergne. Cambridge: University Press, 1953

Codi: 366,027 Autor: Peirol Gènere: Canso Número: XI

 

Pos de mon joi vertadier

I	1	Pos de mon joi vertadier
		si fan aitan voluntier
		devinador e parlier
		enveyos e lauzengier
	5	segon la fazenda,
		coven qu’ieu mi atenda;
		qar ginh mi a mestier
		ab qu’ieu mi defenda
		que negus non aprenda
	10	mon celat cossirier.
II		De midons aic de premier
		l’enveya e·l dezirier,
		et ab gran esfortz sobrier
		mi ten que ren mais non qier.
	15	Mas com que m’enprenda?
		Mos cors me ditz qu’atenda
		e sofra; e sofier,
		perqu’ieu cre qu’esmenda
		m’en fass’ amors e·m renda
	20	qualque plazer leugier.
III		Tal vetz es non puosc sufrir
		qu’ab mi mezeis no m’azir
		e vuelh m’en ab tan partir
		qu’en autre domnei me vir;
	25	pero si·s remuda
		malautes can mielh cuda
		en autra part garir,
		e res no m’ajuda;
		anz fas lucha perduda,
	30	qu’ades torn sai murir.
IV		Ai! tan doussamen dezir,
		si pogues esdevenir,
		c’amors mi fezes jauzir
		aissi cum la·m fetz chauzir.
	35	Trop l’ai atentuda
		mas ‘la flam’ esconduda
		es greus ad escantir’.
		Tot’ es remasuda
		l’esperanssa vencuda
	40	que·m solia esbaudir.
V		Pero ades mi sove
		qu’amors deu atrair’ a se
		franc coratg’ ab bona fe
		mielhs que negun’ autra re.
	45	E silh on s’eslansa
		tota ma deziransa
		pus mon cor sap e ve
		no·m torn en viltansa;
		c’aitan co·l reis de Fransa
	50	sui hieu rics d’amar be.
VI		E pus autre pro no·m te,
		preyar l’ai enquer de me,
		qu’auzit ai retrair’ ancse
		que chaitius es qi·s recre,
	55	e sai ses doptansa
		qu’el a desesperansa.
		Quant hom troba merce,
		dobla l’alegransa
		e·l joys e·l benenansa
		a selh cui esdeve.
VII	60	Dalfi, ses duptansa
		joy’ e pretz vos enansa
		mielhs c’amors no fai me.