Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Codi: 461,013 Autor: Anonyme Gènere: Canso Número: IX

 

A l'entrada del tans florit

I		A l'entrada del tans florit,
		que nos sons del yver partit,
		me sunt bel chant et lai et crit
		que font cil auseillon petit;
	5	adont mi membre d'une amor
		qui m'a tornat en lonc oublit,
		s'encor a fin ioi no·n secor.
II		Pos entre lou viure et morir
		estau e non mi pos partir,
	10	assas mi degre detenir,
		pos en altre non ab consir;
		et se·n faisie tant d'anor
		que mi laissast ses mans tenir,
		adont aurai ioi et baudor.
III	15	Per oc, s'ai dit gran hardiment,
		que eu n'esguar nul failliment
		et, pos far me poc de neent,
		prei li que·n aie causiment;
		ensinc garrai de ma dolor,
	20	qui m'a tengut un an vertent,
		que neguns hom non ab peior.
IV		Dosne, de vos me blasm' et lau,
		et guerpirai siecle charnau,
		et pos lou ben mi torn' al mau,
	25	tan me metrai per vostre esclau.
		Per oc si prei al credator
		que·n lais remirar vostre ostau:
		mais me·n preis d'un emperador.
V		Per ceste amor ferai orgueill,
	30	et totes altres non acueill;
		assas me·n preis mais que non sueill,
		qu'eu crei que la verront mi oeill;
		ia Dex no·n des pluz de richor
		maiz qu'a li fusse dins un brueill,
	35	que l'auzel chanten sor la flor.
VI		Ab un petit d'amar no·n lais,
		que rienz no·n ai al que lou fais;
		si·n torne mos iois en biais
		de l'amor qu'aten en pantais.
	40	Se no·n rent a breu ma valor,
		laissar mi cuit del tot eschais
		et far moines en refretor.