Aston, S. C.. Peirol. Troubadour of Auvergne. Cambridge: University Press, 1953

Codi: 366,029 Autor: Peirol Gènere: Tenso Número: XXXI

 

Quant Amors trobet partit

I	1	Quant Amors trobet partit
		mon cor de son pessamen,
		d’una tenson m’asalhit,
		e podetz auzir comen.
	5	‘Amix Peirols, malamen
		vos anatz de mi lunhan;
		e pus e mi ni en chan
		non er vostr’ entencios,
		diguatz; pueys que valretz vos?’
II	10	‘Amors, tan vos ai servit,
		e nulhs pechatz no·us en pren,
		e vos sabetz quan petit
		n’ai avut de jauzimen.
		No·us ochaizo de nien
	15	sol que·m fassatz derenan
		bona patz, qu’als no·us deman;
		que nulhs autres guazardos
		no m’en pot esser tan bos.’
III		‘Peirols, metetz en oblit
	20	la bona domna valen,
		que tan gent vos aculhit
		e tan amorozamen,
		tot per mon comandamen?
		Trop avetz leugier talan!
	25	e no·us era ges semblan,
		tan guays e tan amoros
		eratz en vostras chansos.’
IV		‘Amors, anc mais no falhit,
		mas ar falh forsadamen;
	30	e prec Dieu Jhesu que·m guit,
		e que trameta breumen
		entre·ls reys acordamen,
		que·l socors vai trop tarzan,
		et auria mestier gran
	35	que·l marques valens e pros
		n’agues mais de companhos.’
V		‘Peirols, Turc ni Arabit
		ges per vostr’ envazimen
		no laissaran Tor Davit.
	40	Bon cosselh vos don e gen;
		amatz e chantatz soven.
		Iretz vos, e·l rey no·i van?
		Veiatz las guerras que fan;
		et esguardatz dels baros
	45	cossi trobon ochaizos.’
VI		‘Amors, si li rey no·i van,
		del Dalfi vas dic aitan;
		ja per guerra ni per vos
		no remanra, tant es pros.’
VII	50	‘Peirols, maint amic partran
		de lurs amiguas ploran,
		que, si Saladis no fos,
		sai remazeran joios.’