Stimming, Albert. Der Troubadour Jaufre Rudel, sein Leben und seine Werke. Berlin: August Hettler, 1873

Codi: 262,006 Autor: Jaufre Rudel de Blaja Gènere: Canso Número: I

 

Quand lo rossinhols el folhos

I	1	Quand lo rossinhols el folhos
		dona d’amor en quier en pren
		e mou son chant jauzen jojos
		e remira sa par soven ;
	5	eil riu son clar eil prat son gen,
		pel novel deport, que renha,
		mi ven al cor grans jois jazer.
II		D’un’ amistat soi envejos,
		car no sai joja plus valen,
	10	c’or e dezir, que bonam fos,
		sim fazia d’amor prezen ;
		quel cors a gras, delgat e gen,
		e ses ren, quei descovenha,
		es s’amors bon’ ab bon saber.
III	15	D’aquest’ amor soi cossiros
		velhan e pueis sompnhan durmen,
		car lai ai joi meravilhos,
		per qu’ieu la jau jauzitz jauzen ;
		mas sa beutatz nom val nien,
	20	car nulhs amicx nom essenha
		cum ieu ja n’aja bon saber.
IV		D’aquest’ amor sui tant cochos,
		que quand ieu vauc ves lieis corren,
		vejaire m’es, qu’a reversos
	25	m’en torn, e qu’ella m’an fugen ;
		e mos cavals i vai tan len,
		greu er, qu’oimais i atenha,
		s’amors no lam fai remaner.
V		De tal dompna sui cobeitos,
	30	a cui non aus dir mon talen,
		anz quan remire sas faissos,
		totz lo cors m’en vai esperden ;
		et aurai ja tant d’ardimen,
		quel aus dir, per sieu mi tenha,
	35	pois d’als non ll’aus merce querer ?
VI		A ! cum son siei dich amoros
		e siei faich son doutz e plazen !
		qu’anc non nasquet sai entre nos
		neguna, c’ajal cors tant gen,
	40	grailes, fresca, ab cor plazen,
		e non cre, genser s’ensenha,
		ni non vi hom ab tant plazer.
VII		Amors, alegres part de vos,
		per so car vau mon mielhs queren,
	45	e soi en tant aventuros,
		qu’encaras n’ai mon cor jauzen,
		la merce de mon bon guiren,
		quem vol em apell’ em denha
		e m’a tornat en bon esper.
VIII	50	E qui sai reman delechos
		e dieu non sec en Belleen,
		non sai, com sia jamais pros,
		ni com ja venh’ a guerimen ;
		qu’ieu sai e crei mon escien,
	55	que cell, cui Jhesus ensenha,
		segura escola pot tener.