Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Aparat crític
* Notes
* Traduccions
* Imatges

 

Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Codi: 213,003 Autor: Guillem de Cabestaing Gènere: Canso Número: III

 

Ar vei q’em vengut als joms loncs

I 1 Ar vei q’em vengut als joms loncs,
    qel flors s’arenga sus els troncs,
    et au d’auselhs chans e refrims
    pels plaissaz q’a tengutz embroncs
  5 lo freiz, mas ara pels soms sims
    entre las flors els brondels prims
    s’alegra chascuns a son for.
     
II   Mas eu m’esbaudisc em demor
    per un joi d’amor q’ai al cor,
  10 don m’es douz desiriers taziz,
    qe menz qe serps de sicamor
    men deslonh per uns vars fraidiz,
    ans toz autre jois m’es oblitz
    contr’ amor don pauc ben ajust.
     
III 15 Anc pois nAdam colhi del fust
    lo pom don tuich em en tabust,
    tan bella non aspiret Crists
    del cors avinen car e just
    blanc e lis plus q’us amatists;
  20 tant es il bella q’eun sui trists,
    car de me noill ve plus de sonh.
     
IV   Ni ja eu non serai tan lonh
    de l’amor qem liam’ em ponh,
    del cor sin parta ni s’esquins,
  25 mas a las ves qant si deslonh,
    s’espandis defors e dedins;
    adoncs sui cuberz claus e cins
    d’amor plus qe de flors isops.
     
V   Eu am tant qe meinz n’a morz trops,
  30 e tem qem sia lo jorns props,
    q’amors m’es car’ eu li sui vils,
    ni ges aitals nom fora ops,
    qel focs qe m’art es tals, qe Nils
    nol tudaria plus, q’us fils
  35 delgaz sostenri’una tor.
     
VI   Mas eu sols las! sostenc l’ardor
    e la pena qem ven d’amor,
    ab dolz desirs ab grans destrics,
    en vei palezir ma color;
  40 pero non dic qe, s’er’ antics
    e blancs devenguz come nics,
    de re de ma domnam clames.
     
VII   Car domna fai valer ades
    los desvalenz els fels engres;
  45 qar tals es francs et agradius,
    qe, si ja domna non ames,
    vas tot lo mon fora esqius,
    q’ieun sui als pros plus humilius
    e plus orgolhos als savais.

 

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI