Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Codi: 213,007 Autor: Guillem de Cabestaing Gènere: Canso Número: VI

 

Mout m’alegra douza votz per boscatge

I	1	Mout m’alegra douza votz per boscatge,
		qau retentis sobral ram qi verdeja
		el rossinhols de son chantar chandeja
		josta sa par el bosc per plan usatge,
	5	et au lo chant del auzel qi tentis;
		don mi remembra douza terr’el pais
		el benestar de ma domna jausia,
		don mi dei ben alegrar, s’eu sabia.
II		Ben dei aver gran joi en mon coratge,
	10	pos toz bons prez en ma domna s’autreja,
		e de beutat null’autra non enveja,
		tant la fez deus de covinen estatge;
		car se era entre sos enemis,
		non dirian, q’anc mais tan bella vis;
	15	senz es en lei beutaz e cortesia,
		homs non la ve qi cent tan melh non dia.
III		En autra terra irai penre linhatge,
		si qe jamai en aqesta non seja,
		e lausenher qi m’an mort per enveja,
	20	n’auran gran joi, qan me veiran salvatge;
		e men irai com paubres pelegris,
		el desirier m’auran tantost aucis,
		e se mais non ben ai amor servia,
		eus servirai tot lo jorn de ma via.
IV	25	Va ten sospirs, en loc de fin messatge,
		dreit a midons on toz bos prez s’autreja,
		e digaz li, qe autre nom enveja,
		nim stau aclis ves autre senhoratge;
		can mi membra sos bels olhs o sos vis,
	30	a pauc non mor, can de leis me partis;
		partis no men eu ja ni me partria,
		anz es mos cors ab leis e noit e dia.
(V		Tant es de prez e de valor enclausa,
		q’ieu non volgra, qe fos ma cusina,
	35	e vertadiers eu reman qi la lausa,
		ni non a par d’aici tro a Mesina;
		e si volez, q’eu vos diga son nom,
		ja non trobarez alas de colom
		on nol trovez escrig senes falhenza,
	40	mais an leier e mōster cognoscenza.)